BAUCAU, 17 setembru 2024 (TATOLI) – Pasiente na’in-10 ne’ebé hetan asidente tráfegu iha Com, munisípiu Lautém, oras ne’e halo hela tratamentu iha Ospitál Rejionál Eduardo Ximenes (HoREX, sigla portugés) Baucau.
Médiku Jerál HoREX Baucau, Juvito dos Reis, esplika, husi númeru referida kompostu husi ema-boot na’in-ualu no labarik idade ki’ik naiin-rua ho tinan-ida no neen.
“Transfere husi postu internamentu Lautém mai iha-ne’e hamutuk na’in-10, sira-ne’e kondisaun kanek hotu-hotu grave,” Médiku Jerál hateten iha Vila Nova, tersa ne’e.
HoREX Baucau simu pasiente hirak-ne’e iha loron-15 setembru ne’ebé pasiente na’in-ualu kompostu ema-boot na’in-neen no rua idade ki’ik transfere ona ba Ospitál Nasionál Guido Valadares (HNGV, sigla portugés) tanba kondisaun grave no kontinua halo teste raiu-xís tanba mákina iha HoREX Baucau seidauk funsiona.
“Pasiente na’in-lima diagnóstiku trauma, na’in-tolu mak tenke kontinua transfere imediata, enkuantu na’in-rua seluk mak halo hela observasaun iha HoREX,” Juvito akresenta.
Asidente tráfegu iha Com akontese iha loron-domingu, 15 setembru purvolta oras 03:00 lokraik bainhira pasajeiru sira utiliza karreta marka hilux ho xapa-matríkula B.10.151 hodi rezulta ema na’in-tolu lakon vida no na’in-13 hetan kanek grave.
Jornalista : Natalino Belo
Editór : Evaristo Soares Martins
