DILI, 17 setembru 2024 (TATOLI)-Komisaun Anti Korrupsaun (CAC, sigla portugés), asegura Diretór na’in rua tanba suspeitadu fó projetu ba nia kolega.
Kargu Xefia na’in rua ne’ebé ekipa CAC asegura mak Diretór Jerál Servisu Korporativu Ministériu Agrikultura Peskas, Pekuaria no Floresta (MAPPF) ho inisiál RGG no Diretór Nasionál Aprovizionamentu MAPPF ho inisiál MR.
Ekipa CAC asegura kargu xefia na’in rua ne’e iha sira na’in rua nia kna’ar fatin Ministériu Agrikultura Peska Pekuária no Floresta iha Comoro, tersa (17/9) ohin tuku 8:30 dadeer.
Hafoin asegura tiha kargu xefia na’in rua ne’e lori kedan mai iha edifísiu Komisaun Anti Korrupsaun Farol hodi submete ba prosesu identifikasaun durante oras 12 tuir artigu 52 Kódigu Prosesu Penál.
Ekipa Komisaun Anti Korrupsaun halo mós apreensaun ba dokumentu balun ne’ebé liga ho ba projetu iha Ministériu Agrikultura Peska Pekuária no Floresta.
Iha prosesu identifikasaun ne’e kargu Xefia MAPPF na’in rua ne’e koopera di’ak tebes ho ekipa Investigasaun Kriminál CAC nian hodi prosede ba identifikasaun tuir lei haruka.
Tuir Diretór Investigasaun Kriminál Komisaun Anti Korrupasaun, José Verdial, iha tersa (17/09) ohin, purvolta oras servisu nian maizumenus tuku 8:30, ekipa informasaun husi CAC nian, ba direta iha Ministériu Agrikultura hodi hasoru dirijente balun relasiona ho informasaun ne’ebé espalla iha media sosiál.
“CAC iha kompeténsia ba asaun prevensaun no investigasaun kriminál nian, tanba ne’e ekipa CAC halo kedas asaun proativu ida hodi bele hatene loloos motivu hosi informasaun ne’ebé espalla iha media sosiál ne’e loos ka lae. Ami ninia ekipa ba hasoru duni dirijente na’in-rua iha Ministériu Agrikultura no Peska. Ami lori ona mai iha Edifísiu CAC nian hodi halo prosesu indentifikasaun,” José Verdial hateten ba jornalista sira iha nia knaar fatin CAC Farol, tersa ohin.
Nia dehan, kualkér informasaun ne’ebé espalla, liga ho informasaun ho ba indísiu nian, entaun CAC hanesan órgaun ida-ne’ebé iha kompeténsia hodi haree kona-ba iha tipu krime hanesan ne’e ho nune’e CAC tenke asegura hodi halo prevensaun.
“Kualkér informasaun hotu-hotu ne’ebé atu dehan loos no la loos ne’e tenke liuhusi prosesu ruma mak ita foin hatene, katak ida-ne’e loos, ida ne’e laloos no ida-ne’e iha indísiu ida ne’e laiha indísiu, tanba ita hotu hatene lei fó dalan ba iha órgaun polísia kriminál sira, tanba ita iha tempu oras 12, hodi bele halo identifikasaun,” nia adianta.
José Verdial hateten, liuhosi prosesu indentifikasaun ne’e termina depois mak foin hatene informasaun ne’ebé espalla ne’e loos ka lae.
“Portantu normalmente ohin ne’e ita halo ona identifikasaun de’it, husi identifikasaun hirak ne‘e mak ekipa investigadór sira buka hatene informasaun sira ne’ebé espalla ne’e katak iha indísiu ka laiha indísiu,” nia konklui.
Jornalista: Natalino Costa
Editór: Rafael Ximenes de A. Belo
