DILI, 17 setembru 2024 (TATOLI)—Reprezentante povu iha uma fukum Parlamentu Nasionál (PN), liuhusi Deputada CNRT, Maria Gorumali Barreto, husu Governu atu prioriza iha Orsamentu Jerál Estadu (OJE) 2025 hodi fó atensaun ba populasaun iha aldeia balun iha munisípiu Bobonaro ne’ebé to’o agora seidauk asesu eletrisidade.
Notísia Relevante: Populasaun Bobonaro 15.834 asesu ona eletrisidade
Tanba, nia dehan, durante iha periódu resesu hala’o kontaktu eleitorál iha baze rona preokupasaun husi komunidade katak, Timor-Leste restaura ona independénsia tinan 20-resin ona maibé aldeia balun to’o agora seidauk asesu eletrisidade.
“Tanba ita besik ona tama iha Orsamentu Jerál Estadu (OJE) 2025 ninian, no komunidade iha munisípiu Bobonaro liuliu ba iha aldeia sira-ne’ebé mak seidauk asesu ba eletrisidade. Sira sujere katak komunidade barak hetan naroman ona, maibé sira aldeia balun seidauk asesu ba iha eletrisidade,” Nia levanta liuhusi reuniaun plenária iha PN, tersa ne’e.
Nune’e, nia rekomenda ba Governu Konstitusionál da-sia (IX) oinsá tau prioridade ba iha aldeia sira-ne’ebé to’o agora seidauk asesu eletrisidade.
Deputadu FRETILIN, Dário Madeira, mós hato’o katak iha Viqueque presiza nafatin eletrisidade, tanba iha fatin barak seidauk asesu liuliu iha postu administrative Uatulari ne’e, aldeia barak no suku foun balun ne’ebé harii ona seidauk asesu ba eletrisidade.
Iha reuniaun plenária dahuluk, ohin ne’e, hafoin Deputadu sira hala’o resesu durante fulan rua, Deputadu FRETILIN, Antonino Doutel Sarmento, mós levanta preokupasaun seluk ne’ebé durante resesu hala’o kontaktu eleitorál balun iha baze liuliu iha Turiskai ita-nia komunidade sira preokupa liu mak mota sira-ne’ebé mak laiha ponte.
“Ezemplu, liga suku Aitimua ba Mindelo sai ba Tutuluru, sira preokupa atu bele iha ponte fasilita sira estudante no populasaun nia movimentu ba eskola no lori produtu ba merkadu iha tempu udan, tanba se ida-ne’e la halo prezúdika sira-nia movimentu,” nia dehan.
Aleinde ne’e, nia dehan, preokupasaun hanesan husi komunidade iha suku Lesiwata liga ba Fatukalo mós hanesan, iha mota ne’eba bainhira tempu udan fó risku ba sira-nia movimentu labele asesu ba merkadu no labarik sira labele la’o ba eskola ho di’ak.
“Ita imajína iha aldeia ida iha Ermor iha Fatukalo, dook tebe-tebes, kuaze volta kilómetru tolu, populasaun sira husi aldeia ne’e atu mai iha suku rasik kuaze alunu iha 60-resin. Entaun, sira preokupa no Governu liuhusi Ministériu Edukasaun atu atensaun ba asuntu ne’e,” nia hateten.
Iha parte seluk, nia mós foti kona-ba área saúde nian durante hala’o kontaktu eleitorál vizita fasilidade saúde iha suku liuliu iha Tutuluro, aldeia Bata, haree uma ne’ebé harii hela maibé eletrisidade no bee-moos laiha, inklui laiha kama ba enfermeiru no enfermeira atu toba bainhira tama iha tempu kalan, nune’e sira tenke toba iha rai.
“Tanba ne’e presiza tau atensaun ba asuntu sira-ne’e, orsamentu ratifikativu no orsamentu jerál Estadu 2024 ne’ebé aprova ona, maibé to’o ohin, iha baze kondisaun sira laiha, nune’e presiza tau atensaun,” nia hateten.
Vise Ministru ba asuntu Parlamentár, Adérito Hugo da Costa, rejista preokupasaun sira sei enkamina ba ministériu kompetente hodi bele tau atensaun.
Jornalista : Nelson de Sousa
Editór : Cancio Ximenes
