DILI, 17 setembru 2024 (TATOLI) – Ministériu Saúde liu husi Diresaun Jerál Koorporativu hasai ona karta sirkulár ba ospitál sira iha territóriu tomak atu labele autoriza pesoál voluntáriu sira atu servisu.
“Objetivu ami hasai karta sirkulár ida-ne’e ba ospitál sira iha territóriu nasionál atu labele autoriza pesoál voluntáriu sira atu servisu, tanba pesoál voluntáriu sira sem vensimentu husi Governu, ho razaun ida-ne’e mak ami-nia hanoin hapara atu ita bele lori prosesu rekrutamentu tuir mai, tanba ita haruka ema ba servisu voluntáriu ita-nia pesoál kontratadu no permanente sira ne’e atu halo fali saida, entaun ita tenke haree mós situasaun ida-ne’e”, Diretór Jerál Servisu Koorportaivu iha Ministériu Saúde Valentino Lisboa Marçal, informa iha nia fatin Caicoli, ohin.
Nia dehan, durante ne’e pesoál voluntáriu sira servisu makas iha postu saúde no sentru saúde sira maibé Governu hapara tanba fó espasu ba pesoal kontratadu no permanentnte atu halo servisu.
“Dala barak ita haree sentru saúde no postu saúde sira ita-nia kolega voluntáriu sira servisu makas, entaun ita hapara voluntáriu sira ne’e atu fó espasu ba pesoál kontratadu no permanente atu halo servisu, ita haree fasilidade saúde ne’ebé mak menus, ita presiza halo rekrutamentu ba sira ne’ebé mak esperiénsia iha ona bele halo servisu”, nia esplika.
Nia afirma, voluntáriu sira servisu iha kada fasilidade saúde, ida-ne’e mós Ministériu Saúde laiha koñesimentu kona-ba ida-ne’e, tanba ne’e husu Diretor Servisu Saúde Munisípiu sira, banhira koloka pesoál voluntáriu tenke fó koñesimentu ba Ministériu Saúde nune’e bele hatene.
“Kada fasilidade saúde sira simu pesoál voluntáriu maibé laiha koñesiemntu no dadus mai ami la iha, ida-ne’e mak problema, entaun husi ida-ne’e mak ha’u-nia ekipa sira sei tun ba halo monitorizasaun, nune’e ita haree sentru saúde ida ne’ebé mak presiza pesoál saúde, ita bele halo rekrutamentu sira, tanba ne’e voluntáriu sira ita sei haree ba prioridade sira ne’ebé mak iha, ita sei tau iha ne’eba tanba ne’e ami halo ona kontaktu ona ho Diretór Servisu Saúde sira atu haree fasilidade saúde ida ne’ebé mak nesesidade ita halo rekrutamentu”, nia relata.
Nia haktuir, Ministériu Saúde halo avaliasaun ba profisionál saúde kontratu ne’ebé mak daudaun ne’e halo servisu iha kada fasilidade saúde sira bainhira servisu la di’ak sei hapara hodi kontrata fali ema seluk atu servisu.
Jornalista : Felicidade Ximenes
Editór : Zezito Silva
