Pasiente fase raan la’o normál iha tempu vizita Papa
DILI, 17 setembru 2024 (TATOLI) – Xefe Departamentu Medisina Interna iha Hospitál Nasionál Guido Valadares (HNGV), Gustavo do Rosario da Cruz, dehan pasiente sira ne’ebé fase raan la’o normál maske vizita Papa Fraancisco rezulta halo regra barak maibé pasiente sira hatudu de’it kartaun asesu.
“Ita-nia pasiente sira mai tratamentu fase raan iha ne’e la’o normál, maske ema barak iha dalan maibé sira iha kartaun asesu atu la’o ba mai tuir oráriu ne’ebé mak iha, entaun ita-nia sua santidade Papa Fraancisco nia vizita ne’e ita-nia maluk pasiente sira fase raan lao ho di’ak”, Gustavo do Rosario da Cruz informa ba jornalista sira iha HNGV, ohin.
Nia dehan, pasiente fase raan halo tratamentu iha ne’e tanba sira-nia movimentasuan fase raan ne’e kontinua de’it, entaun iha loron tolu nia-laran, Papa vizita ne’e, sira-nia tempu mai ospitál halo tratamentu la’o di’ak.
“Pasiente fase raan ne’ebé mak duraante ne’e porvolta 100-resin, depois ita iha kazu foun balun ne’ebé mak halo tratamentu iha loron vizita sua santidade Papa francisco ne’e iha neen”, nia esplika.
Nia afirma, transferensia ba pasiente fase raan ba rai liur, durante ne’e laiha tanba mákina aumenta ona no rekursu umanu sufisiente.
“Duraante ne’e ita-nia pasiente ita halo tratamentu iha ne’e hotu, laiha ida mak ita halo traansferénsia ba rai liur, tanba ita-nia rekursu umanus no mákina sufiente atu atende ita-nia pasiente sira”, nia afirma.
Pasiente sira ne’ebé mak mai fase raan iha ne’e iha kategoria rua, hanesan akut no krónika, akut mak pasiente ne’ebé mak mai tratamentu depois rekoopera no la halo kontinuasaun, agora krónika mak ema ne’ebé kontinua fase raan nune’e bele moris.
Jornalista : Felicidade Ximenes
Editór : Zezito Silva
