DILI, 17 setembru 2024 (TATOLI)—Membru Parlamentu Nasionál (PN) liuhusi Deputadu bankada CNRT, Angela Corubelo, husu autoridade lokál atu kontrola populasaun balun sunu-rai iha foho lolon ne’ebé fó impaktu ba ambiente.
“Hato’o ha’u-nia preokuopasaun liuliu prezervasaun meiu ambiente, ita la’o tuir foho sira-ne’e kalan no loron ema sunu ahí hodi halo foho sira mutuk hotu, agora daudaun ita liu-bá atu parte leste no loro-monu fali ita haree foho sira-ne’e nakukun sai metan hotu, triste tebes tanba sunu-rai no sunu-aí sai tiha hanesan kultura ida-ne’ebé iha tempu bailoron ema sempre sunu,” Nia levanta liuhusi reuniaun plenária iha uma fukun PN, tersa ne’e.
Nune’e presiza prezerva Timor-Leste nia ambiente tan sunu ai-hun sira-ne’ebé buras nomós oho animál fuik sira-ne’ebé moris iha ai-laran.
Timoroan barak sempre hakilár kona-ba bee laiha, rai-manas tanba bailoron, tanba ai-hun matak bele halo oksijéniu hodi kria udan mai, hahalok ne’e iha tempu udan mai ninia impaktu rai monu no inundasaun, nune’e presiza halo pevensaun.
“Ha’u husu ba Governu liuliu entidade kompetente, autoridade lokál husi xefe suku, xefe aldeia, prezidente autoridade munisípiu atu fó hanoin ba populasaun konsensializa sira hodi halo sensibilizasaun atu labele sunu-rai hodi prezerva ita-nia ambiente,” nia dehan.
Ba guarda floresta sira presiza halo kontrola di’ak liután tanba sunu-rai ne’e tina-tinan sempre akontese no to’o agora menus atensaun, entaun ida ne’e grave tebes.
Prezidente Parlamentu Nasionál, Maria Fernanda Lay, sekunda liga ho asuntu ema sunu-rai ba iha mudansa klimátika realmente ne’e Timor-Leste ita iha problema.
“Maibé sensibilizasaun ida-ne’e ita haree de’it, Santu Padre liu tiha, saida mak akontese iha sidade laran, komplikadu, tanba ne’e problema ita-nian. Ha’u hanoin tenke iha sansaun ba ema sira-ne’ebé so’e lixu arbiru. Hanoin Governu tenke toma medida, maibé PN iha komisaun hodi hala’o fiskalizasaun hodi ita haree konkretamente, ita hato’o ba hó rekomendasaun no solusaun,” nia dehan.
Vise Ministru ba asuntu Parlamentár, Adérito Hugo da Costa, rejista preokupasaun ne’e sei enkamina ba entidade relevante hodi tau atensaun.
Jornalista : Nelson de Sousa
Editór : Cancio Ximenes
