DILI, 17 setembru 2024 (TATOLI)—Prezidente Repúblika (PR), José Ramos Horta, hato’o karta eskrita hodi informa ba Parlamentu Nasionál (PN) atu hala’o vizita privadu ba Repúblika Principado Monáco iha semana oin.
“Ita iha ajenda reuniaun plenária tersa (17 setembru 2024) ne’e, ajenda períodu antes orden do dia, iha informasaun kona-ba vizita privadu Prezidente Repúblika (PR), José Ramos Horta, ba repúblika Principado Monáco,” Prezidente Parlamentu Nasionál, Maria Fernanda Lay, fó sai iha reuniaun plenária PN, tersa ne’e.
Tuir konstituisaun iha artigu 80 (Auzénsia) iha númeru 3 hateten bainhira atu halo viajen partikulár, ho durasaun la to’o loron sanulu resin lima, la presiza husu lisensa ba Parlamentu Nasionál maibé Prezidente-Repúblika tenke hato’o koñesimentu ba Parlamentu Nasionál.
Nune’e, PR informa sei auzente territóriu nasionál viajen privadu ba iha Repúblika Principado Mónaco iha períodu komprendidu entre loron 24 no 30 setembru 2024 inkluziva.
PR mós hato’o konvite ne’ebé simu atu partisipa iha Mónaco ho ninia programa inklui palestra nu’udar oradór prinsipál kona-ba tema Timor-Leste nu’udar merkadu foun emerjente, prevista iha loron 27 setembru 2024, no enkontru privadu ho amigu pesoál prinsipe soberanu Mónaco.
Nune’e, PR antesipa hato’o agradese ba atensaun husi Prezidente Parlamentu Nasionál no deputadu sira ba kona-ba karta informasaun ne’ebé hato’o ba órgaun soberania daruak ne’e.
Jornalista : Nelson de Sousa
Editór : Cancio Ximenes
