DILI, 18 setembru 2024 (TATOLI) – Diretór Investigasaun Kriminál, Komisaun Anti-Korrupasaun, (CAC,sigla portugés), José Verdial, dehan CAC seidauk submete auto notísia ba Ministériu Públiku kona-ba kazu diretór na’in-rua iha Ministériu Agrikultura Peskas, Pekuaria no Floresta (MAPPF).
“Agora daudaun ita seidauk submete auto notísia ba Ministériu Públiku tanba kolega sira sei halo hela análize ba dokumentu balun ne’ebé suspeita fó projetu ba malu ba iha ministériu”, José Verdial hateten ba TATOLI via telefone, kuarta ne’e.
Verdial rekorda, CAC halo identifikasaun, horseik, ba dirijente na’in-rua husi MAP liga ho informasaun ne’ebé espalla iha rede sosiál tanba suspeita mosu aktu korrupasaun iha prosesu aprovizionamentu iha ministériu.
Nia realsa, informasaun ida-ne’e virál tebes iha rede sosiál, tanba ne’e CAC hanesan orgaun polisiál kriminál iha kompeténsia ba prevensaun ba aktu korrupasaun nian, entaun presiza haree didiak.
“Kuandu ita dehan deskonfia buat ruma, entaun mosu mós buat ida indísiu ona. Entaun atu ba indísiu ka laos indísiu ne’e ita tenke liuhusi prosesu ida. Tanba ne’e horseik ita halo prosesu identifikasaun ba dirijente na’in-rua ne’e atu haree iha indísiu ka laiha. Entaun ita presiza halo indentifikasaun no halo análize ba dokumentu sira ne’ebé ita horseik rekolla, ne’e horsida depende ba rezultadu análize mak ita foin hatene, hafoin halo konkluzaun, se iha indísiu ita halo promosaun no automatikamente ita sei haruka ba Ministériu Públiku”, nia konklui.
Jornalista: Natalino Costa
Editór : Zezito Silva
