DILI, 18 setembru 2024 (TATOLI)—Ministériu Edukasaun (ME) legaliza ona diploma hamutuk 2.162 iha fulan-jullu to’o setembru tinan ne’e nia laran.
“Ami simu diploma estudante nian husi fulan-jullu to’o mai metade setembru ne’e hamutuk 2.162. Ita kada loron atende ema na’in-50 maibé kuandu tempu estudante universitáriu sira atu graduasaun, entaun bele loron-ida ita legaliza 300-resin, ne’e tanba kada ema fotokopia diploma tahan lima no kaderneta eskolár tahan tolu. Nune’e mós, depende ba rekrutamentu bolsa estudu ne’ebé iha,” Diretór Nasionál Ensinu Sekundáriu Jerál iha ME, Benjamin Fernandes, informa iha ninia knaar fatin, Vila-Verde, kuarta ne’e.
Legaliza ida-ne’e la’ós de’it iha Dili maibé iha munisípiu mós iha, tanba ne’e diresaun atende de’it tuir nesesidade estudante sira.
“Se estudante sira hetan bolsa estudu no atu graduasaun ruma mak dehan hatama dokumentu lalais inklui ho diploma sira-ne’e, entaun diresaun ne’e simu estudante nia diploma ida mai ho urjentemente ne’e ami haruka hein no fó kedas, maibé se la urjénsia ne’e dadeer sira hatama hela lorokraik mak mai foti, se lae aban dadeer mak mai foti. Ita nunka husik prosesu kleur to’o loron-rua ba leten,” nia tenik.
Notísia relevante : ME legaliza diploma ensinu sekundáriu-tékniku vokasionál 2.881
Estudante, Ivonia Mendonça, hateten, diresaun nia serbisu legaliza ne’e ajuda no fasilita tebes estudante sira.
“Atendimentu iha Ministériu Edukasaun liu-liu ba diresaun asina diploma nia ne’e di’ak tebes tanba sira la’o tuir regra ne’ebé iha, entaun fasilita tebes estudante sira-ne’ebé hakarak submete dokumentu ba bolsa estudu inklui graduasaun ruma,” nia katak.
Jornalista : Osória Marques
Editora : Julia Chatarina
