OÉ-CUSSE, 18 Setembru 2024 (TATOLI) – Ministériu Ensinu Superiór, Siénsia no Kultura (MESSK) disemina informasaun kona-ba kritériu sira atu asesu ba Universidade Nasionál Timor Lorosa’e (UNTL) no Institutu Politéknika Betano (IPB) iha tinan akadémiku 2025, liuliu sobre rejime jerál no espesiál ba estudantes sira iha Rejiaun Administrativa Espesiál Oé-Cusse Ambeno (RAEOA).
Ekipa téknika husi MESSK, Sebastião Manuel Perreira, informa katak atividade divulgasaun ne’e importante ba estudante sira iha ensinu sekundariu jerál no tékniku vokasionál sira atu iha koñesimentu, nune’e bele asesu ba ensinu superiór públiku iha tinan akadémiku 2025.
Nia dehan matéria sira ne’ebé aprezenta iha diseminasaun ne’e kona-bá kritéria sira-ne’ebé estabelese iha diploma ministeriál númeru 54/2024, loron 25 Jullu, kona-ba rejime jerál no rejime espesiál.
“Rejime rua ne’e iha rejime jerál mak ensinu sekundáriu tékniku vokasionál no ensinu sekundáriu jerál. Ba rejime espesiál ne’e, iha sub-rejime hamutuk 16”, dehan.
Tanba ne’e, alvu husi sensibilizasaun mak tranzmite ba autoridade lokál sira, konsellu veteranu munisípiu, diretór eskola atu iha informasaun adekuada, depois hatutan fali ba estudante sira-ne’ebé hakarak atu asesu ba UNTL no IPB. Nune’e, bainhira to’o momentu halo inskrisaun, alunu no entidade sira hotu iha ona koñesimentu, liuliu ba kritériu sira.
“Kaléndariu inskrisaun sei hahú iha loron 21 to’o 25 Outubru 2024, maibé ohin ami fó sai ona iha diseminasaun ne’e. Bainhira besik atu inskrisaun, MESSK fó anúnsiu ofisiál ba públiku no distribui ba edukasaun munisipíu atu prepara-aan hodi konkorre ba vaga sira-ne’e”, nia adianta.
Iha ámbitu ne’e, MESSK divulga mós kona-ba kritériu rejime espesiál oportunidade kabe ba estudante finalista sira-ne’ebé akaba antes ona iha 2020 to’o 2023, ne’ebé iha direitu bele asesu ba IPB no UNTL. Nune’e mós disemina kona-ba rejime espesiál bolsa hakbiit, ne’ebé rejime ne’e mai husi inan-aman ne’ebé laiha kbiit finansiamentu.
Nia salienta katak maske nune’e la taka dalan mós ba estudante sira-ne’ebé defisiente, tanba MEESK kria mós rejime espesiál ida ba sira, nune’e mós rejime espesiál ba forsa seguransa sira PNTL no F-FDTL atu asesu ba ensinu superiór públiku.
Iha sorin seluk, Xefe Departamentu INFORDEPE no Kurríkulu Ezame Nasionál, Damião da Costa, hateten atividade ne’e importante atu alunu sira bele hasa’e koñesimentu kona-ba prienximentu formatu ne’ebé prepara husi UNTL no IPB.
“Esplikasaun ohin ba boletin atu fahe ba eskola sira atu prienxe. Ida ne’e orientasaun klara, liuliu ba prienximentu ba formatu ne’ebé iha, tanba akontese iha tinan kotuk liubá estudante sira ladún komprende. Ne’e mak RAEOA nia númeru asesu ki’ik liu, maske ita iha kapasidade maibé falla iha kritériu no prienxe formatu”, katak.
Tanba ne’e, nia reprezenta Servisu Edukasaun Oé-Cusse husu ba profesór sira, liuliu dirijente eskola atu hatutan informasaun ba eskola sira, nune’e estudante sira bele iha koñesimentu.
Hola parte iha sensibilizasaun ne’e mak estudante sira, dirijente eskola hotu iha RAEOA no konsellu veteranu.
Notísia relevante: MESSK disemina kritéria rejime jerál no espesiál asesu UNTL-IPB iha Oé-Cusse
Jornalista: Abílio Elo Nini
Editora: Maria Auxiliadora
