DILI, 19 setembru 2024 (TATOLI) – Diretór Nasionál Farmasia Produtu Médiku (DNFPM), Delfim Ferreira, hateten Ministériu Saúde, iha 2025, esforsu atu teste ai-moruk hodi hatene ninia kualidade.
“Tinan oin ita esforsu atu bele kapasita rekursu umanu, ita-nia laboratóriu nasionál tanba ita-nia ekipamentu sira ne’ebé teste ai-moruk ne’e iha ona fatin, maibé atu kapasita de’it rekursu umanu sira, entaun ida-ne’e mak esforsu ne’ebé mak ami halo hela atu ba oin ita halo rasik iha ne’e tanba durante ne’e ita haruka ba Austrália hodi teste iha ne’eba”, Delfim Ferreira dehan iha Timor Plaza, ohin.
Nia esplika, iha buat balun ne’ebé presiza atu kompleta tan, ezemplu; ekipamentu balun ne’ebé mak presiza sosa tan maibé tinan oin ita lao uluk ho buat ne’ebé mak iha ona.
“Ekipamentu balun ita sei sosa maibé tinan oin ita lao uluk ho buat ne’ebé mak iha ona”, Delfim afirma.
Iha fatin hanesan, Vise-Ministru Saúde ba Operasionalizasaun Ospitál, Flávio Brandão Mendes de Araújo, hateten Governu tenke halo ona teste ai-moruk nina kualidade iha rai laran.
“Ba oin ita tenke harii tanba hanesan nasaun projeta ba oin katak autoridade regulamentu medikamentu ne’e tenke eziste iha ita-nia rain, nune’e ita bele teste rasik ho buat ne’ebé mak ita iha ona”, Flávio konklui.
Jornalista : Felicidade Ximenes
Editór : Zezito Silva
