DILI, 20 setembru 2024 (TATOLI)–Prezidente Autoridade Munispiu Dili (AMD), Gregório Saldanha, husu ba populasaun atu so’e lixu iha iha lixeiru hodi labele hafoer ambiente no fó impaktu ba saúde públika iha kapitál.
“AMD halo esforsu hasai sirkulár ba autoridade postu no suku sira atu avizu ba komunidade so’e lixu tuir oras no sei kria programa halo limpeza ba iha sesta-feira kada semana,” Prezidente Autoridade Munispiu Dili (AMD), Gregório Saldanha, hateten iha Caicoli.
Nia husu populasaun sira akompaña sensibilizasaun AMD nian ba Dili moos, oinsá kuidadu ambiente saudável, instituisaun Polísia Nasionál Timor-Leste no Falintil-Forsa Defeza Timor-Leste mós bele kontribui ba iha atividade sensibilizasaun hodi redús lixu iha kapitál.
AMD kopera ho parseiru sira hodi halo atividade suku moos liuhusi konkursu ba video, múzika, no kuda ai-horis no hamoos suku ba ema hotu iha kapitál hodi kuidadu Dili HAMURAK.
“Lixu responsabilidae AMD nian, maibé ami labele serbisu mesak, ami kontinua apela ita serbisu hamutuk. Tenke iha dixiplina so’e lixu. Ema tau ona kaixote lixu iha fatin lixu nian, tau iha kaixote nia laran, labele so’e foer iha rai, ida-ne’e ladi’ak. Ida-ne’e problema konsiénsia ema hotu nian. Ita hotu luta nafatin, mídia, parlamentu no governante sira no estrutura munisipiu no suku nian no estudante sira tenke kontribui,” nia dehan,
Nia dehan komunidade ba soe lixu iha lixeiru, labele soe iha rai atu difikulta ekipa sanemaentu ba rekolla lixu, ne’e hanesan ema karik halo tiha uma maibé toba iha li’ur de’it, tanba ne’e mak presiza iha konsiénsia ema-nian ba haree situasaun ka problema soe lixu.
Ekipamentu kamioneta moderna hodi rekolla lixu iha kapital hodi mellora serbisu raut foer, maibé presiza iha konsiénsia populasaun nian oinsá soe lixu loloos iha fatin ne’ebé loloos no labele hatoman-aan hodi soe lixu arbiru de’it.
Nia hateten, lixu sira-ne’e la rezolve iha tempu badak nia laran, bele iha krítika maibé dalan ne’e atu hadi’a liuhusi mlema AMD nian mak “Dili HAMURAK” katak “Dili Hakmatek, Moos no Furak” ne’ebé sai fatin di’ak ba ema hotu.
“Dili ema hotu nian, la haree ema nia orijinalidade moris no husi ne’ebé, maibé mai iha Dili, ema hakarak moris no ema hotu iha obrigasaun atu halo Dili sai moos,” nia dehan.
Jornalista : Jesuína Xavier
Editór : Cancio Ximenes
