DILI, 20 setembru 2024 (TATOLI)–Diretór Ezekutivu Luta Hamutuk, José Alves da Silva, husu ba membru Governu sira Insituisaun Estadu atu kontrola nia funsionáriu sira hanesan diretór ka xefe gabinete atu labele foti desizaun tuir kompeténsia sira-ne’ebé kabe superiór sira-nian.
Notísia Relevante: Kazu iha MAPPF diretór aprezenta ona keixa ba PCIC
“Saida mak diretór no xefe gabinete Ministériu Agrikultura halo ne’e estraga imajen governasaun ninian. Ita haree ministru sai kiik tiha, ida ministru fó serbisu ne’e mak sai fali superiór ba ministru, ha’u hanoin ida ne’e labele akontese. Ha’u mak ministru, ha’u mak manda hodi kontinua, ha’u mak hare no la’o tuir nafatin prinsipiu boa governasaun nian”, Diretór Ezekutivu Luta Hamutuk, José Alves da Silva, hateten ba Agência Tatoli, relasiona ho kazu funsionáriu Ministériu Agrikultura no Peska ne’ebé fó projetu ba nia kolega, iha eskola Téknika Vokasionál Becora.
Tanba ne’e, nia enkoraja ministru atu bele kontrola nia funsionáriu sira atu foti desizaun no labele iha poder estra ne’ebé boot-liu fali ministru nia kargu, ida ne’e etapa ida di’ak hodi kombate korpusaun iha instituisaun Estadu hotu-hotu.
Nia elojia servisu Komisaun Anti Korupsaun (CAC, sigla portugés) ne’ebé bele halo buska ba ajente sira-ne’ebé suspeita komete krime sira oioin mós iha instituisaun Estadu sira.
“Atu sala ka los ne’e kestaun segundu, maibé iha ona informasaun sira hanesan ne’e iha públiku, CAC tenke halo intervensaun hodi halo medida ruma. Públiku tenke matan moos hodi hare asuntu ne’e. Ha’u hanoin ida ne’e ita tenki agaradese ba iha servisu CAC ne’ebé komesa sensivel haere ba asuntu sira krorupsaun ninian. Tanba tinan hirak liuba, sira hein keixa, agora ida-ne’e sira haree liuhusi meiu oioin, bainhira asesu ba informasaun sira bele kontinua buska ne’e di’ak tebe-tebes. Ita enkoraja nafatin serbisu ne’e ho di’ak,” nia hateten.
Dirijente ne’e mós husu ba públiku atu fó informasaun kona-ba kazu korrupsaun sira, bainhira la la’o tuir nia dalan, tenke hato’o keixa maibé importante mak iha prova atu hato’o no la presiza karta formál atu halo detensaun ka buska, maibé bele liuhusi meiu oioin atu uza, importante públiku hatene kontestu liga boa-governasaun no má administrasaun.
Iha fatin seluk, Diretór Ezekutivu Forum Organizasaun Naun Governamental Timor-Leste (FONGTIL), Valentim da Costa Pinto, hateten husu ba Provedoria Direitu Umanu no Justisa (PDHJ) no Inspetur Jerál Estadu no autoridade sira seluk tenke fornese informasaun loloos ba governante sira atu halo melloramentu.
“Se iha duni eru ruma ne’ebé komete mai husi superiór no funsionáriu balun tenke iha responsabilidade, tanba lakohi Timor ida-ne’ebé rai kiik no rekursu natoon, kontinua halo sasán ida-ne’ebé kontinua afetadu ba ema barak nia vida. Ida-ne’e tenke hapara no tenke konsiente katak Timor-Leste sei iha situasaun ki’ak nia laran, tanba Timor-Leste kontinua iha liu 4,0% mak moris iha liña pobreza,” nia dehan.
Nia sujere ba funsionáriu públiku sira tenke ho vontade no onestidade atu bele jere ho di’ak rekursu Estadu nian, hodi oferese kondisaun di’ak ba sidadaun sira hotu.
“Ne’e hatudu saida? Partika korupsaun no má jestaun hanesan bu’at ida la’os nia direitu tenki para. Pratika má jestaun no korupsaun hanesan esplorasaun ba rekursu Estadu, ne’ebé ita lalika permite ida-ne’e akontese,” nia dehan.
Jornalista : Jesuína Xavier
Editór : Cancio Ximenes
