PNTL estabelese KPK iha suku Uaitame hodi reforsa seguransa
VIQUEQUE, 20 setembru 2024 (TATOLI)-Polísia Nasionál Timor Leste (PNTL) munisípiu Viqueque, sesta ne’e, estabelese Konsellu Polisiamentu Komunitária iha suku Uaitame, postu Uatulari hodi refosa seguransa iha suku laran.
Tuir Komadante Operasionál PNTL munisípiu Viqueque, Inspitór Xefe José Afonso, esplika, estabelesimentu KPK atu asegura situansaun iha nivél suku la’ós Ofisiál Polísia Suku (OPS) de’it, maibé presiza apoia husi sivíl iha suku ne’e rasik.
“Establese KPK iha munisípiu Viqueque hi objetivu atu asegura situasaun iha suku laran, se la’ós ita mak asegura se loos, se la’ós agora bainhira loos”, Inspetór Xefe José Afonso, hateten iha serimónia posse ba membru KPK, iha sede suku Uaitame, ohin.
Ho ida-ne’e nia dehan, Komandu nasionál to’o munisípiu forma KPK nune’e konflitu saida de’it maka mosu iha suku, autoridade suku hamutuk ho membru KPK ne’ebé ohin simu pose bele rezolve problema sira-ne’ebé ki’ik iha suku no OPS sai mediadór, krime públiku levanta ba ministériu públiku maibé la taka dalan KPK hodi rezolve, rezolve ramata aprezenta rezultadu ba MP hodi taka kazu referida.
“Ha’u husu ba KPK suku Uaitame ne’ebé ohin simu ona pose ne’e sai ona parseiru serbisu OPS iha suku, karik kazu ruma akontese iha suku laran kanaliza informasaun ba OPS suku Uaitame, eskuadra PNTL Uatulari no PNTL munisípiu. Ha’u sente parseiru serbisu sai importante tanba seguransa ne’e la’ós PNTL de’it, presiza ema hotu nian apoiu hodi evita problema sira-ne’ebé akontese iha futuru mai”, nia realsa.
Iha fatin hanesan, Xefe KPK atuál Xefe suku Uaitame, Marcelino Pinto Alves, haktuir estabelese KPK hodi kompleta parte seguransa sira iha suku Uaitame no durante loron rua membru sira tuir ona formasaun kona-ba seguransa nian.
“Tanba ne’e ha’u hanoin ida-ne’e sai hanesan responsavél ba konsellu suku nune’e ba oin membru KPK sei tuir hamutuk hodi hadi’a estrutura KPK no regra ruma implementa iha suku Uaitme. Ha’u rekomenda karik ami hasoru difikuldade ruma, ami sei koordena ho OPS, eskuadra no minisípiu”, ni subiña.
Tuir dadús membru KPK ne’ebé simu posse na’in-38 ne’ebé deklara katak hahú husi ohin loron sei serbisu ho espiritu voluntáriu ba interese nasaun hodi kontribui ba asegura pás no estabilidade iha bairru, aldeia, suku, postu no munisípiu.
Sei kolabora mós ho OPS, eskuadra no komandu munisípiu hodi kria parseiru ida forte ho membru komunidade ba lalaok polisiamentu ne’ebé preventivu no pro-ativu. Depende legalidade direitu povu iha suku atu moris iha ambiente armonia, hakmatek, páz no seguru no esforsu hamutuk ho OPS no entidade relevante sira iha suku laran, hodi kria konsiénsia no mantein seguransa no ordem públiku iha aldeia suku, postu, no munisípiu.
Enkuantu, membru KPK sira-ne’ebé simu formasaun durante loron rua hahú kuarta, 18 to’o 19 Setembru 2024 ne’ebé oferese husi unidade polísiamentu komunitária komandu munisípiu Viqueque.
Rekorda fali katak munisípiu Viqueque suku hamutuk 36 no postu lima, husi númeru ne’e PNTL munisípiu Viqueque konsege estabelese ona KPK iha suku 27 ho totál ema ne’ebé sai membru KPK na’in-1.378 no PNTL sei establese tán iha suku 9 ne’ebé seidauk simu pose.
Jornalista : Vitorino Lopes da Costa
Editór : Florencio Miranda Ximenes
