DILI, 20 setembru 2024 (TATOLI)—Prezidente Parlamentu Nasionál (PPN), Maria Fernanda Lay, sesta ne’e, simu audiénsia ho Diretora ezekutivu ASEAN Parlamentár for Human Rights (APHR), Yuyun Wahyuningrum ho delegasaun hodi diskute kooperasaun serbisu.
Deputada Lidia Norberta hateten, objetivu husi enkontru ohin ne’e atu sekretariadu ASEAN Parlamentár for Human Right mai hasoru Prezidente Parlamentu hodi nune’e fó hatene ba órgaun soberania ida-ne’e kona-ba serbisu saida mak APHR halo hamutuk ho membru Deputadu sira iha atividade sira-nian no mós atu insentiva deputadu sira, liuliu Deputadu foun hodi sai mós membru APHR.
“Aleinde ne’e sira mós mai konsulta husu ba ita, kona-ba asuntu saida de’it mak sai hanesan importante hodi bele haree ba iha tinan lima oin mai, ho nune’e iha loron kuarta ita halo ona enkontru ho sira para hodi fó kontribuisaun ita-nia kona-ba asuntu sira-ne’ebé tenke diskute. No, ohin mós mai hasoru Prezidente Parlamentu iha tan input husi Prezidente Parlamentu. Ida mak relasiona ho elaborasaun lei cyber crime no ida seluk tan mak oinsá envolve feto maluk sira iha atividade APHR ne’e,” Deputada Lidia Norberta hateten ba jornalista sira hafoin akompaña PPN hala’o enkontru iha sala komferénsia PN.
Diretora APHR, Yuyun Wahyuningrum, hateten ohin membru husi APHR mai halo diskusaun asuntu estratéjiku sira ba tinan lima oin mai oinsá ASEAN Parlamentár bele apoiu liu ba asuntu direitu umanu, oinsá mak estratéjia Parlamentu atu bele halo promosaun liután demokrásia iha ASEA no APHR nu’udar organizasaun membru deputadu iha ASEAN.
Enkuantu, Parlamentu Nasionál rasik iha grupu nasionál Timor-Leste ba ASEAN Parlamentár of Human Rights.
Jornalista : Nelson de Sousa
Editór : Cancio Ximenes
