PNTL no família hetan ona Nilvia ho kondisaun mate iha Bahatata
VIQUEQUE, 21 setembru 2024 (TATOLI)-Polísia Nasionál Timor Leste (PNTL) eskuadra Uatucarbau hamutuk família no autoridade lokál, sábadu ne’e, maizumenus tuku 13:00 lokraik hetan ona Nilvia da Cruz ho idade tinan ualu (8) ne’ebé mota lori foin lalais kurta ne’e ho kondisaun mate.
Komandante PNTL Eskuadra Uatucarbau, Sarjentu Xefe Polísia Jacob Amaral, informa, kazu ne’e akontese iha loron 18 fulan-setembru tinan 2024 tuku 12:30, PNTL eskuadra postu Uatucarbau simu informasaun mota lori labarik na’in-tolu, maibé na’in-rua salva-an no na’in ida maka lakon.
“Nune’e ami informa kedas ba komandu PNTL munisípiu Viqueque, depois komandu kontaktu kedas ba Autoridade Protesaun Sivil (APC, sigla portugés), bombeiru iha tuku 21:00 kalan to’o postu Uatucarbau, no dadeer tuku 7;00 iha loron 19 setembru desloka kedas ba fatin akontesementu hodi buka labarik ida mota lori lakon,” Jacob Amaral informa ha TATOLI liuhusi telefónika, sábadu ne’e.
Komunidade, família, autoridade lokál sira no membru PNTL sira buka to’o tuku 17:00 lokraik lahetan entaun ekipa retira.
“Ohin sábadu (21/09) ne’e família sira hamutuk autoridade lokál no membru PNTL eskuadra Uatucarbau kontinua buka mak foin hetan iha área Daragata Loilu, tuku 15:00 lokraik ne’e labarik ho kondisaun mate,” nia informa.
Jacob Amaral dehan, daudaun ne’e família haloot ona mate-isin ba ninia rezidénsia iha suku Bahatata hodi família halo prosesu fúnebre.
Xefe suku Bahatata, postu administrativu Uatucarbau, munisípiu Viqueque, Patrício Maria Pinto, informa, akontesimentu mota Uaibere lori labarik na’in-tolu, maibé na’in-rua salva no na’in-ida lakon vida.
Tuir kronólojia katak akontesimentu mota lori labarik na’in-tolu ne’e, tanba sira sai husi eskola atu ba tuir sira-nia inan aman ne’ebé iha natar ko’a hare, depois udan tún rezulta mota boot nune’e sira na’in-tolu hakuur mota Uaibere.
“Iha momentu ne’e mane boot konsege ultrapasa ba mota sorin, na’in-rua hakuur ba to’o iha mota klaran maka mota lori ki’ik na’in-rua, na’in ida mota lori soe iha fatuk leten mak sei moris, feto ida ho naran Nilvia da Cruz ho idade ualu mota lori no ohin hetan ona Nilvia nia isin mate, maibé liutiha loron tolu foin hetan,” Patrício relata.
Enkuantu labarik mota lori ne’e husi aldeia Neluai, suku Bahatata, postu Uatucarbau, aman ho naran Gilberto Aparíci no inan Rita da Cruz.
Jornalista : Vitorino Lopes da Costa
Editór : Floréncio Miranda Ximenes
