VIQUEQUE, 23 setembru 2024 (TATOLI)-Komisaun Nasionál Eleisaun (CNE, sigla portugés), segunda ne’e, introdús prosesu eleisaun munisípal ba estudante iha Sekundáriu Katóliku Santo Estevão.
Komisáriu CNE destakdu munisípiu Viqueque, Olavio da Costa Almeida Monteiro, esplika, CNE oferese edukasaun sivika ba estudante sira hodi konsolida demokrásia no eleisaun ba poder lokál, atu estudante sira bele iha koñesimentu liuliu ba eleisaun munisipál.
“Durante ne’e ita hala’o ona eleisaun prezidensiál, parlamentár no eleisaun suku, maibé eleisaun ba asembleia munisipál, Prezidente Munisípiu no vise prezidente munisípiu ne’ebé durante ne’e ita seidauk hala’o. Tan ne’e liuhusi edukasaun sivika ida-ne’e ita partila ba estudante sira hodi kompriende prosesu eleisaun ne’ebé futuru akontese”, Olavio da Costa Almeida Monte8ro, hateten ba jornalista sira, iha salaun Eskola Santo Estevão Viqueque Vila, ohin.
Komisáriu CNE destakdu munisípiu Viqueqeu ne’e subliña, eleisaun munisipál akontese depede ba polítika Estadu no Governu nian, karik akontese tinan oin ka tinan rua tán mai, maibé tenke hahú prepara an.
“Tanba ne’e agora halo preparasaun, lá’os eleisaun mosu maka foin ita halo preparasaun ne’e la biban, ema balun laiha koñesementu ba eleisain. Nu’udar sidadaun tenke hatene dever no obrigasaun sira hodi partisipa dezenvolvielmentu iha ita-nia nasaun no hari’i estadu diretu demokrátiku. Ba eleisaun munisípál bázeia lei munisípiu ne’ebé hetan aprova iha tinan kotuk mak hanesan lei númeru 22/2021, kona-ba lei eletorál no lei númeru 23/2021 kona-ba lei poder lokál no dezentralizasaun administrativu”, nia hato’o.
Iha fatin hanesan, Diretór Eskola Santo Estevão Viqueque, Martinho Amaral, agradese ba CNE munisípiu Viqueque ne’ebé hili eskola ne’e hodi realiza edukasaun sivika ba estudante sira.
“Edukasaun sivika ida-ne’e importante ba ita. Tanba ita atu hakat ba eleisaun munisipál ita presiza iha koñesementu ida kona-ba prosesu eleisaun, atu ita ezerse ita-nia funsaun karik bele la’o di’ak, ita mak sai susesu ba eleisaun sira-ne’ebé akontese iha ita-nia rain”. nia realsa.
Entretantu edukasaun sivika ne’e oferese husi CNE munisípiu Viqueque ne’ebé envolve mós Sekretariadu Tékniku Administrasaun Eletorál (STAE) Viqueque, pontu fokál Sekretáriu Estadu Igulidade (SEI) Viqueque, reprezenta Komadante Polísia Nasionál Timor Leste (PNTL) munisípiu Viqueque, reprezenta autoridade munisípiu Viqueque no hetan partisipa másimu husi estudante Santo Estevão no profesór sira ho totál na’in-120 resin.
Jornalista : Vitorino Lopes da Costa
Editór : Florencio Miranda Ximenes
