DILI, 23 setembru 2024 (TATOLI)—Deputada CNRT, Carminda Carlota, husu Ministériu Obra Públika (MOP) atu tau atensaun hadi’a estrada ba fatin potensiál turizmu bee-tudak no bee-mutin iha suku Soelesu, postu administrativu Bobonaro, munisípiu Bobonaro.
“Rona direta husi povu no xefe suku sira husi Soelesu, ita-nia xefe suku no povu sira hato’o katak turizmu potensiál ida iha suku Soelesu mak hanesan bee-tudak no mós bee-mutin, tanba natureza ne’ebé furak tebes maibé área ne’eba estrada mak ladi’ak,” nia levanta liuhusi reuniaun plenária Parlamentu Nasionál, segunda ne’e.
Ne’eduni, nia dehan, povu no líder komunitária sira iha ne’eba husu ba Ministériu Obra Públika (MOP) atu bele hadi’a netik estrada iha ne’eba, hodi nune’e turista lokál no estranjeiru sira ba fatin refere, maibé kondisaun estrada mak to’o agora seidauk hadi’a.
Iha intervensaun, Deputada Carminda Carlota, Deputadu CNRT, Marcos Xavier, Antóninho Doutel Sarmento, levanta mós asuntu infraestrutura no husu ezekutivu atu tau atensaun ba kondisaun estrada Lolotoe, Turiscai, Gleno.
Vise Ministru ba asuntu Parlamentár, Adérito Hugo da Costa, rejista preokupasaun sira hodi enkamina ba entidade tutela hodi fó atensaun.
Jornalista : Nelson de Sousa
Editór : Cancio Ximenes
