OÉ-CUSSE, 23 Setembru 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhusi Sekretaria Rejionál ba Asuntu Administrasaun prepara ona funsionáriu orden públika na’in-11 atu halo operasaun ba animál ne’ebé sei kontinua movimentu livre iha área urbana. Atividade ne’e sei hetan akompañamentu mós husi parte autoridade polisiál.
Sekretáriu Rejionál ba Asuntu Administrasaun, André Lao, hateten asaun konjunta ne’e sei envolve autoridade lokál sira no PNTL hodi halo operasaun iha suku lima mak hanesan Nípani, Costa, Cunha, Lalisuk no Lifau.
“Ami sai duni iha fulan-Maiu, maibé ita informa de’it ba komunidade sira no seidauk kaer [animál], maibé ita-nia populasaun balun seidauk kumpre, ne’ebé ekipa ordén públika sira seidauk iha fardamentu, agora sei iha prosesu produsaun ne’ebé bainhira iha mak ita foin halo operasaun atu kaer animál ne’ebé la’o livre hela iha área urbana”, André Lao dehan ba Tatoli iha Oé-Cusse, ohin.
Nia salienta katak programa ne’e kontinuasaun husi antoridade anteriór ne’ebé atu animál sira nme’e labele hafo’er estrada no fó impaktu ba ambiente, inklui minimiza asidente.
“Ami-nia operasaun ne’e la’ós ho brutál, maibé sei hatudu profisionál tuir lei ne’ebé iha. Antes ne’e, ami hala’o ona sensibilizasaun, agora sai ba públiku aviza no informa ba komunidade sira. Faze tuirmai ne’e ita sei kaer, ne’ebé ida-ne’e tuir etapa, la’ós urjénsia”, nia dehan.
Animál ne’ebé tama alvu mak karau, bibi, fahi no kuda, tanba daudaun ne’e husi Sekretaria Rejionál ba Asuntu Agrikutura kria ona fatin ba sentru atu tau animál ne’ebé atu ka’er.
“Fatin iha Maquelan, suku Taiboko, ne’e prepara uluk kedas. Bainhira ka’er iha área urbana, sei bá tau iha ne’ebá, depois nia na’in mak sei hasai ho presu mak hanesan karau no kuda $100, bibi no fahi $50. Osan ne’e sei depozita direta ba kofre Estadu no bele liuhusi leilaun ba públiku. Ita sei la estraga animál”, nia adianta.
Notísia relevante: Orden públika Oé-Cusse presiza transporte ba operasaun animal iha área urbana
Xefe Suku Costa, Fransisco Colo, dehan planu atu halo operasaun ba animál ne’e autoridade lokál sira simu ona nota informativa hodi aviza tutan ba komunidade iha bairru idak-idak.
“Suku Costa iha vila, ne’ebé despaixu ami simu ona, xefe aldeia no xefe bairru sira mós informadu. Bá oin, karik iha operasaun ita akompaña, karik komunidade balun lakoi kumpre sei simu nia konsikuénsia kuandu animál hetan ka’er. Tanba ne’e, ami apoia atu animál hothotu tau iha luhan, labele husik livre”, nia aviza.
Notísia relevante: Autoridade Pante Makasar apela abitante sira sulan animál iha luhan
Asaun ne’e bazeia ba Dekretu-lei númeru 12/2014, loron 14 fulan-Maiu, kona-ba restrisaun movimentu tráfiku animál iha área urbana, bandu ema atu labele husik animál la’o livre iha estrada laran, liuliu fahi, bibi no karau.
Jornalista: Abílio Elo Nini
Editora: Maria Auxiliadora
