DILI, 23 setembru 2024 (TATOLI)—Deputadu FRETILIN, Antoninho Doutel Sarmento, preokupa ho povu nia oan iha aldeia Ermori nu’udar povu ida do’ok liuhusi sidade kapitál Manufahi nian ne’ebé liga besik Laclubar, ho distánsia dook tebes atu asesu eskola.
“Sábadu foin dadauk, ha’u to’o iha ne’eba, labarik tinan neen ona seidauk ba eskola, tanba husi aldeia ne’e ba to’o suku Fatukalu ne’e kilómetru lima (5). Iha labarik kuaze 60-resin labele apreende iha edukasaun ida iha eskola no lahó adekuadu di’ak. Tanba ne’e, husu atu konsidera ida-ne’e, se bele tau atensaun ba labarik sira iha baze ne’eba, tanba edukasaun importante tebe-tebes,” Nia levanta liuhusi reuniaun plenária Parlamentu Nasionál (PN), segunda ne’e.
Tan ne’e, nia husu presiza tau atensaun iha baze tanba labarik sira iha baze labele asesu eskola ho di’ak tanba fatin dook tebes.
Aleinde ne’e, iha kontaktu eleitorál iha semana kotuk simu preokupasaun husi konsellu inan- aman iha suku Tutuluru-Manufahi eskola Dom Maumeta, iha diretór eskola ida de’it mak hanorin alunu sira iha eskola ne’eba laiha manorin.
“Tan ne’e, husu oinsá mak ME tau planu integradu iha nível edukasaun tau ita-nia profesór sira iha ne’eba hodi hanorin eskola sira ho di’ak, hodi hasa’e edukasaun ne’ebé povu kiik bele eskola ho di’ak no sira mós iha direitu atu esplora siénsia ne’ebé di’ak hodi garante futuru nasaun,” nia dehan.
Deputada CNRT, Carminda Carlota, husu Ministériu Edukasaun (ME) atu kontrui tan saladeaula iha eskola filiál ida iha suku Aibiu. postu administrativu Bobonaro, munisípiu Bobonaro.
Tanba, foin lalais halo kontaktu eleitorál iha baze rona preokupasaun direta husi autoridade suku no povu iha ne’eba presiza kria kondisaun hodi aumenta saladeaula.
“Xefe aldeia sira mós hato’o iha eskola filiál Aibou, aldeia Sifi, eskola ne’e ho estudante 115, maibé ho totál sala tolu de’it, ho nune’e povu iha aldeia refere husu Ministériu Edukasaun atu presiza konstrui tan saladeaula ida, hodi nune’e kompleta saladeaula,” nia dehan.
Vise Ministru ba asuntu Parlamentár, Adérito Hugo da Costa, rejista preokupasaun sira sei enkamina ba ministériu tutela hodi tau atensaun.
Jornalista : Nelson de Sousa
Editór : Cancio Ximenes
