Hahú novembru, UNTL esklui estudante nia naran husi tinan 2000-2012 iha sistema
DILI, 23 setembru 2024 (TATOLI)–Universidade Nasionál Timor-Lorosa’e (UNTL) iha fulan-novembru tinan ne’e, sei esklui estudante nia naran ne’ebé halo inskrisaun iha tinan 2000 to’o 2012.
Vise-Reitór ba asuntu akadémiku no garantia kualidade iha UNTL, Samuel Freitas, hateten, estudante sira ne’ebé la mai ona halo re-admisaun ne’e automátikamente tenke hamoos ona naran iha sistema.
“Durante ne’e ita fó oportunidade ba sira atu mai re-admisaun nune’e bele kontinua nia estudu to’o ramata, maibé to’o agora estudanteouituan de’it mak mai fali halo re-admisaun, entaun ita sei hein hela sira to’o loron 31 outubru. Husi 31 outubru ne’e mak sira nafatin la mai, depoisde finadu tama fali serbis, automátikamente ita-nia ekipa téknika sei hamoos naran estudante sira ne’e iha sistema baze dadus,” Vise-Reitór informa iha ninia knaar fatin, segunda ne’e.
Notísia relevante : UNTL hahú disemina informasaun kona-ba asesu ensinu superiór públiku
Hafoin hamoos tiha estudante sira-nia naran husi tinan 2000-2012 ne’ebé la mai re-admisaun ne’e iha sistema, sei kontinua fali ba faze daruak.
“Faze primeiru ne’e ita hasai hotu tiha husi sistema. Ita sei haree fali ba segundu faze ne’ebé hahú husi anu letivu 2013 ba leten, sé mak uluk tama iha tinan 2013 to’o 2018 no 2019 to’o agora seidauk hotu ne’e, ita sei fo tan tempu ba sira hanesan iha faze primeiru nia mak la re-admisaun automátikamente ita tenke elemina,” nia akresenta.
Nune’e mós, ba estudante foun sira ne’ebé tama iha anu letivu 2020 ba leten mós sistema Drop Out (DO) ne’e vale hotu ba sira.
“Ba estudante foun sira ne’e mós keta hanoin de’it mak eskola no eskola pois to’o tempu hotu mak dehan hotu, maibé konsiente ba katak sistema DO ne’e automátikamente vale hotu ona ba imi, tanba ne’e hanoin didi’ak ida-ne’e,” nia fó hanoin.
Enkuantu, estudante husi tinan 2000-2012 ne’ebé la ramata estudu hamutuk 9.253, ne’ebé husi númeru ne’e iha 238 mak mai halo ona re-admisaun, enkuantu 9.015 seidauk.
Diretór Nasionál Atendimentu Estudante, Rui Loco Pires, hateten, re-admisaun ba estudante la ativu husi tinan 2000-2012 nian sei termina iha fulan-outubru nia rohan.
“Re-admisaun ba estudante la ativu husi tinan 2000-2012 sei ramata iha 31 outubru tinan ne’e, no desizaun antes ne’e parte universidade foti mantein hodi implementa DO, karik liu ona data ne’ebé termina ba re-admisaun nian, maka parte universidade sei hasai naran husi sistema estudante UNTL nian, depois sei kontinua publika faze daruak nian ne’ebé sei desidi liuhusi reuniaun ho parte kompetente universidade nian,” nia informa.
Jornalista : Osória Marques
Editora : Julia Chatarina
