BAUCAU, 23 setembru 2024 (TATOLI) – Uma-lisan hamutuk 12 hetan inséndiu iha aldeia Maucale, suku Gariuai, postu administrativu Baucau Vila, munisípiu Baucau.
Kazu referida akontese purvolta meudia oras 12:00 bainhira komunidade sira hala’o hela atividade iha to’os nune’e derrepente ahi alastra ba uma-lisan no afeta ba uma-lisan seluk hodi rezulta hamutuk uma-lisan 12 hetan estragus totál.
“Inséndiu ne’e akontese bainhira komunidade sira laiha fatin no hala’o hela atividade nu’udar agrikultór iha to’os no natar,” Xefe Suku Gariuai, Arlindo Belo Freitas informa ba Agência TATOLI liuhusi telefónika, segunda ne’e.
Autoridade suku simu informasaun kona-ba kazu referida direitamente halo kontaktu ba Autoridade Protesaun Sivíl (APC, sigla portugés) liuhusi ekipa Bombeiru Baucau direita ba terrenu hodi halo atuasaun ba inséndiu referida.
Fatin akontesimentu nu’udar knua ba uma-lisan haat ne’ebé totál hamutuk uma-lisan 15 no hela uma-lisan tolu mak konsege ekipa Bombeiru hamutuk ho komunidade salva, enkuantu uma-lisan 12 estragus totál.
Husi uma-lisan 12 ne’e kompostu husi Gialeu hamutuk neen, Gualeu Uaimuta hamutuk rua, Kaiono uma-lisan rua no Bercoli hamutuk uma-lisan rua.
Arlindo Freitas, husu ba Governu liuhusi Sekretaria Estadu Asuntu Arte no Kultura atu fó atensaun ba kazu referida hanesan direita ba fatin akontesimentu nune’e bele ajuda no tulun komunidade.
“Husu ba Governu atu direitamente to’o iha terrenu hodi haree situasaun ne’ebé komunidade hasoru,” Arlindo Freitas akresenta.
Nia husu ba komunidade iha Gariuai atu evita sunu rai iha tempu bailoro naruk tanba bele afeta no hamosu inséndiu ba uma komunidade iha suku referida.
Entertantu, kazu inséndiu iha Maucale provizóriu seidauk hetan apoia emerjénsia husi parte relevante no to’o agora sediauk hatene materiál hirak mak hetan estragus iha inséndiu ne’e.
Jornalista : Natalino Belo
Editór : Evaristo Soares Martins
