DILI, 23 setembru 2024 (TATOLI)—Membru Parlamentu Nasionál (PN) liuhusi Deputada bankada PD, Maria Teresa Gusmão, husu Ministériu Saúde (MS) atu selu ka rezolve dívida iha ospitál Malásia ho Singapura.
“Husu ba Ministériu Saúde atu rezolve lalais iha dívida ne’ebé husi tempu ba tempu aas ba beibe’ik, nune’e labele prezúdika transferénsia pasiente ba rai-li’ur,” nia levanta liuhusi reuniaun plenária PN, segunda ne’e.
Nia mós husu MS tau atensaun investe ba hasa’e kualidade atendimentu saúde oinsá atu hamenus ona transferénsia pasiente ba rai-li’ur, tanba tuir dadus husi Governu ida ba Governu seluk transferénsia pasiente barak ba beibeik no despeza mós boot ba beibeik ho dívida mós rezolve to’o ohin loron seidauk hotu.
Nia mós sujere ba MS atu tau mós adidu saúde ba nasaun sira-ne’ebé pasiente timoroan transfere ba hanesan Indonézia, Singapura ho Malázia hodi bele tulun liután pasiente no família sira.
Deputadu FRETILIN, David Dias Ximenes “Mandati,” hateten, dívida iha duni hanesan iha ospitál Malázia millaun $2.5 no Singapura millaun $16.
Vise Ministru ba asuntu Parlamentár, Adérito Hugo da Costa, hateten Governu tau atensaun sériu ba dívida no orientasaun ba MS atu rezolve dívida iha ospitál sira-ne’e hodi nafatin fó seguru ba ospitál sira-ne’e hodi fó atendimentu ba ita-nia pasiente sira.
Jornalista : Nelson de Sousa
Editór : Cancio Ximenes
