DILI, 23 setembru 2024 (TATOLI)—Parlamentu Nasionál (PN) liuhusi reuniaun plenária, segunda ne’e, aprova votu númeru 12/VI(2a) pezár no solidariedade ba vítima tufaun Yagi iha Vietanam, Myanmar, Tailándia, Filipina, Laos no Xina ho rezultadu votasaun afavór 64, kontra no abstensaun zero.
“Nune’e pasa votu pezár pasa,’’ Primeira Vise Prezidente Parlamentu Nasionál, Maria Teresinha Viegas, fó sai iha sala plenária PN.
PN Timor-Leste simu ho profundu konsternasaun ba notísia devastadora ho dezastre ne’ebé akontese iha Sudeste Asiátiku, kauza populasaun lubun nia vida no trajédia umanitária.
Ho udan makas konsekente inundasaun no deslizamentu rai provoka halakon ema rihun ba rihun ninia vida umana, no destrui iha nasaun amigu.
Ema millares halo dezalojada, infraestrutura no área agrikultura hetan estragu, kompromete seguransa alimentár husi komunidade barak.
Enkuantu joven nasaun mós enfrenta dezáfiu signifikativu, inklui dezastre natural atuál, povu timorense sente profundamente ba sofrimentu sira hotu.
Momentu ne’e, PN Timor-Leste expresa ninia profundu pezár ba katástrofe, manifesta ninia solidariedade ba vítima no aprezenta ninia sinsera kondolénsia ba família enlutada no afetadu ba trajédia ne’e.
PN expresa ho apoiu solidariedade ba povu Vietnam, Myanmar, Tailándia, Filipina, Laos no Xina.
PN reafirma mós ninia kompromisu ho kooperasaun rejionál no internasionál ba prevensaun no mitigasaun dezastre natural rekoñese liuhusi uniaun no apoiu mútuo bele enfrenta dezáfiu husi natureza no alterasaun klimátika.
Votu pezár ne’e aprezenta husi Deputadu proponente Duarte Nunes (CNRT), Aniceto Longuinhos Guterres Lopes (FRETILIN), António Verdiál de Sousa (KHUNTO) no Maria Angelina Sarmento (PLP).
Jornalista : Nelson de Sousa
Editór : Cancio Ximenes
