COVALIMA, 23 Setembru 2024 (TATOLI) – Polísia Nasionál Timor-Leste (PNTL) Covalima, liuhusi Seksaun Tránzitu no Unidade Ema Vulneravel (VPU, sigla inglés) divulga informasaun kona-ba Lei Kódigu Estrada no halo prevensaun ba kazu asédisiu seksuál ba estudante Tekniku Vokasionál (TEKVOK) Kristal.
“Polísia Nasionál Timor-Leste ho nia seksaun rua sensibiliza informasaun ba ita-nia estudante sekundáriu ho intesaun atu sira kumpre Lei Kódigu Estrada no kazu asédiu seksuál atu respeita feto sira iha fatin públiku”, Komandante PNTL Covalima, Superintendente Polísia Calisto Gonzaga hateten.
PNTL presiza divulga informasaun ba estudante sira, nune’e sira kumpre kódigu estrada bainhira uza motorizada presiza taka kapasete, tenke iha karta kondusaun ne’ebé sai hanesan kultura no estudante sira mós presiza iha koñesimentu no halo prevensaun kona-ba asédiu seksuál.
Komandante ne’e dehan, iha trimestre datoluk, PNTL nia alvu ba sensibilizasaun ba informasaun mak sobre kódigu estrada no kazu asediu seksuál ho nia alvu ba estudante sira ne’ebé iha nivel ensinu sekundáriu jerál sira iha Covalima, ne’ebé hahú ona iha Eskola Tékniku Vokasionál Kristal no sei kontinua ba Eskola Sekundária Kátolika Ave Maria Suai, Eskola Sekundária Jerál Públiku Suai, nomós komunidade.
Diretór Eskola Tékniku Vokasionál, Gualdino Perreira, hateten alunu sira presiza hatene Lei Kódigu Estrada, tanba sira barak mak uza motorizada no la kontrola aan hodi hamosu asidente.
Aleinde divulga lei ne’e, sensibiliza kona-ba halo prevensaun ba asédiu seksuál atu estudante sira iha koñesementu, nune’e bele respeita feto sira iha fatin públiku.
Estudante Tékniku Vokasionál Krital ne’ebé partisipa iha programa sensibilizasaun ne’e hamutuk 238.
Jornalista: Celestina Teles
Editora: Maria Auxiliadora
