COVALIMA, 23 Setembru 2024 (TATOLI) – Profesór husi Eskola Sekundária Jerál Públiku Suai, Abílio Tilman Batista, halo agresaun fízika hasoru Xefe Departamentu Rekursu Umanu iha Servisu Edukasaun Covalima, Cândido Ferreira, tanba kestaun saláriu fulan-Setembru nian la tama.
Diretora Servisu Edukasaun Covalima, Elda de Fátima, konta tuir katak profesór ne’e halo asaun hasoru xefe departamentu bainhira nia bá konfirma nia saláriu ne’ebé la tama iha rekursu umanu hodi halo esplikasaun, maibé nia la simu.
“Xefe Departamentu Rekursu Umanu halo esplikasaun saláriu Setembru nian la tama, signifika pedidu husu lisensa la ho vensimentu aprova ona. Maibé, profesór Abílio Tilman la simu no buti xefe departamentu nia kakorok no riba ba rai”, Elda de Fátima konta iha Santa Rosa, ohin.
Ho insidente ne’e, dirijente Edukasaun Covalima husu manorin ne’e atu ko’alia di’ak ba malu, maibé profesór ne’e mós tau-liman hodi dudu nia rein-toos no atu tuku tan, maibé seguransa eskola sira dudu sai manorin ne’e bá li’ur.
Elda de Fátima esplika katak profesór Abílio nia saláriu la tama tanba husu pedidu lisensa sein vensimentu durante tinan rua ne’ebé hahú iha Agostu 2024 to’o Agostu 2026.
Iha sorin seluk, manorin Abílio Tilman Batista rekoñese katak nia halo agresaun fízika hasoru diretora edukasaun no xefe departamentu rekursu umanu, tanba nia parte la satisfás ho atendimentu kona-ba husu pedidu sein vensimentu durante tinan rua tanba seidauk simu despaixu.
“Ha’u check saláriu Setembru la tama. Ha’u konfirma ba xefe departamentu rekursu umanu dehan sei prosesa hela, maibé saláriu la tama, ha’u mós dehan tan serbisu la hatene sai xefe departamentu, [nia] hamriik entaun ha’u la kontrola ona ha’u-nia emosaun, ha’u kaer nia kakorok riba ba rai”, nia klarifika.
Komandante PNTL Covalima, Superintendente Polísia Calisto Gonzaga, dehan nia parte rona ona informasaun maibé seidauk simu keixa ruma husi vítima sira. “Ha’u rona ona, maibé seidauk simu keixa husi sidadaun ne’ebé kualkér maneira halo violénsia”, dehan.
Jornalista: Celestina Teles
Editora:Maria Auxiliadora
