Tribunál aplika pena prizaun fulan-tolu no suspende tinan ida ba pasajen moeda falsa
DILI, 23 setembru 2024 (TATOLI) – Tribunál Judisiál Primeira Instánsia Dili (TJPID), liuhusi Juiza Prosesu Albertina Neves, halo leitura ba akordaun no kondena arguidu na’in-tolu ho inisiál AdS, LS no SdS ho pena prizaun fulan-tolu no suspende ba tinan ida.
Arguidu hirak ne’e, Ministériu Públiku akuza ho krime pasajen moeda tanba transfere osan falsu husi Inglatera mai Timor-Leste ho osan montante $900 iha 2020.
Osan sira ne’e arguidu LS nia banin mane mak husi Inglatera manda ba nia oan atu uza, maibé osan ne’e to’o iha Dili, arguidu LS ba troka iha Banku Sentrál Timor-Leste ( BCTL), maibé identifika osan falsa no parte banku kontaktu direta ba Polísia Sientífika Investigasaun Kriminál (PCIC, sigla portugés) hodi detein kedan arguidu sira.
Advogadu Privadu ba arguidu sira, Celestino Guterres, hateten Tribunál kondena kliente ho pena prizaun fulan-tolu no suspende ba tinan ida.
“Ohin Tribunál fó sai sentensa finál ba ha’u-nia kliente na’in-tolu. Iha desizaun ne’e, tribunál dekreta kastigu fulan tolu ba kliente na’in-tolu, depois suspende ba tinan tinan ida”, dehan Celestino ba jornalista sira iha Tribunál, segunda ne’e.
Nia dehan, Tribunál nia desizaun ne’e adekuadu no hanesan defeza sei la halo tan rekursu.
“Hanesan parte defeza konsidera pena ne’ebé Tribunál aplika ba ha’u-nia kliente na’in-tolu ne’e adekuadu no hanesan defeza ha’u la halo tan ona rekursu”, nia konklui.
Jornalista: Natalino Costa
Editór : Zezito Silva
