DILI, 23 setembru 2024 (TATOLI) – Ministra Saúde, Elia dos Reis Amaral, dehan dokumentu atu halo akizisaun ba fasilidade iha Sentru Kardiaku nian iha Lahane presiza verifika di’ak mak halo asina.
“Dokumentu atu sosa ekipamentu kardiaku nian, ha’u seidauk asina, sei iha ha’u-nia meza leten tanba osan ho montante millaun $1, entaun ita tenke verifika didiak hafoin asina”, Ministra Elia dehan. konklui.
Diretora Jerál Servisu Ospitalár iha Ministériu Saúde, Terlinda da Coinceição Barros, dehan Sentru Kardiaku iha Lahane seidauk funsiona tanba fasilidade seidauk iha no hein halo atu akizisaun.
“Ita-nia Sentru Kardiaku Lahane seidauk bele funsiona tanba ekipamentu ita seidauk sosa, ba tinan rua ka tolu tan mak bele, ita foin la’o mesak”, Terlinda hateten iha Ministériu Saúde, ohin.
Nia esplika, kada tinan tenke aloka orsamentu ho fazeadamente to’o millaun $7, hodi sosa fasilidade sira tanba servisu ida-ne’e dedikadu no tékniku tebes.
Nia esplika, Governu kontinua haruka médiku no enfermeiru sira atu kontinua estuda ho objetivu prepara rekursu umanu, hodi fó fali atendimentu ba pasiente sira kardiaku iha iha-nia rain.
“Espesialista atu atende ba leno fuan, ita-nia ema iha, agora kona-ba tau kadeli ba fuan ita- nia intervensaun no fasilidade seidauk iha inklui ita-nia médiku ba ida-ne’e seidauk iha. Tanba ne’e ita kontinua haruka médiku sira ba eskola, aban bainrua kardikau ita estebelese mak sira bele mai atende pasiente sira”, nia hakotu.
Jornalista : Felicidade Ximenes
Editór : Zezito Silva
