Antesipa ahi mate, enerjia solár bele asegura produtu médiku
DILI, 24 setembru 2024 (TATOLI) – Governu Japaun, Programa Nasaun Unidas ba Dezenvolvimentu (UNDP) no Governu Timor-Leste liuhusi Ministériu Saúde no Ministeriu Obras Publika halo lansamentu ba solarizasaun iha Institutu Nasionál Farmasia Produtu Medikamentu (INFPM), atu asegura produtu médiku sira bainhira ahi mate.
“Ohin ita halo lansamentu ba solarizasaun ida-ne’e iha INFPM atu utiliza enerjia ida-ne’e hodi asegura produtu médiku sira bainhira ahi mate”, Embaixadór Japaun iha Timor-Leste, Kimura Tetsuya, dehan ba jornalista sira iha INFPM, ohin.
Embaixadór Japaun ne’e hateten, desde tinan kotuk, Japaun hala’o ona projetu transformasaun verde pasífiku iha Timor-Leste ne’ebé serbisu hamutuk ho UNDP, hanesan ajénsia implementadór. Solarizasaun ida-ne’e hanesan atividade importante ida husi projetu ne’e. Ho kontribuisaun fundu ho millaun $5.78 husi Japaun.
“Ami orgulu tebes bele apoiu ba Timor-Leste nia esforsu ba klima sustentável. Projetu ne’e sei fornese enerjia solár ba família 1000, ne’ebé seidauk hetan enerjia no mós sei fornese fugaun tein 1000 ne’ebé ekolojikamente amigável.Adisionalmente, projetu ne’e mós sei apoiu laboratóriu ICT solár panel 15 iha Eskola Sekundária Vokasionál, nune’e mós, solarizasaun iha Postu Saúde iha Timor-Leste”, nia afirma.
Japaun rekonese katak promove ema nia saúde mak importante liu iha dezenvolvimentu nasaun nian. Iha kontestu ne’e, papél INFPM nian vitál tebes, tanba fornese serbisu nu’udar armajena médika nasionál ba fornesimentu médika ba povu Timor-Leste tomak.
“Tanba ne’e, ha’u kontente katak funsionamentu institutu ida-ne’e sei hametin liután ho fornesimentu enerjia ne’ebé estável liuhusi instalasaun solár painel”, nia relata.
Nia dehan, Japaun sei sai nafatin hanesan amigu konfiansa ba Timor-Leste, implementa projetu dezenvolvimentu iha nasaun tuir nesesidade povu timór nian.
“Hanesan belun di’ak no konfiansa, Japaun iha komitmentu nafatin atu apoiu Timor-Leste, hamutuk ita harii futuru ida ne’ebé sustentável no rejiliente”, nia haktuir.
Iha fatin hanesan, Reprezentante Adjuntu UNDP iha Timor-Leste, Adeline Carrier, ofisialmente ohin halo lansamentu solarizasaun ba INFPM, inisiativa ida-ne’e signifika Timor-Leste nia prontidaun no kompromisu ba jornada transformasaun ne’ebé verde no justu.
“Ami ofisialmente lansa solarizasaun ba Instituisaun Nasionál Farmásia no Produtu Médiku ba Timor-Leste nia prontidaun no kompromisu ba jornada transformasaun ne’ebé verde no justu. Ida-ne’e mosu iha tempu krusiál ida bainhira Timor-Leste sofre hela impaktu sira hosi mudansa klimátika no presiza tebes atu harii rejiliénsia iha nivel lokál no nasionál”, Adeline Carrier dehan.
Nia subliña, projetu transformasaun verde pasífiku nian oferese solusaun ida ne’ebé mak hakarak atinje asaun ambisiozu sira kona-ba klimátika, hodi asegura asesu ba enerjia moos, tranzisaun ida ne’ebé justu no hasa’e seguransa no rejiliénsia enerjétika. Solusaun inovativu ida-ne’e maka momentu definitivu ida iha dependénsia ba enerjia moos ba fornesimentu médiku sira ho kualidade no asegura operasaun efetivu servisu saúde nian.
Vise Ministru Saúde Fortalesimentu Instituisionál Saúde, José dos Reis Magno, ohin hamutuk ho parseiru sira halo lansmantu ba solarizasaun ba Instituto Nasionál Farmasia Produtu Medikamentu atu utiliza enerjia ida-ne’e hodi asegura ba medikamentu sira ne’ebé mak rai iha armajen.
“Ita-nia parseiru sira fasilita INFPM tanba iha ne’e produtu médiku barak hanesan konsumaveis, reajente no vasina sira, entaun ida-ne’e fasilita atu uza ahi bainhira problema, ida-ne’e mantein hodi fó enerjia ba medikamentu sira ne’ebé mak ita rai iha armajen”, José dos Reis Magno deklara.
Diretór Ezekutivu INFPM, Brigido Dias dehan, lansamentu ba solarizasaun ne’e di’ak tebes ba INFPM atu utiliza enerjia ida-ne’e ba medikamentu sira banhira ahi mate.
Jorna;ista : Felicidade Ximenes
Editór : Zezito Silva
