COVALIMA, 24 Setembru 2024 (TATOLI) – Diretór Servisu Saúde Covalima, Domingos Sequeira, informa Covalima preparadu atu hala’o lansamentu ba vasina kontra vírus papiloma umanu (HPV, sigla inglés) ba estudante feto sira hodi prevene kankru kolu úteru.
Maibé lansamentu ba vasina HPV ba estudante sira ne’ebé loloos halo iha 23 Setembru to’o 18 Outubru ne’e adia fali hodi hein desizaun husi Ministériu Saúde (MS).
Dirijente saúde ne’e esplika katak vasina kontra HPV ne’e atu hasa’e imunidade estudante feto sira ho idade entre 11 no 14 hodi prevene moras kankru kolu úteru.
Nia salienta katak pesoál saúde sira preparadu atu hala’o kampaña vasinasaun HPV, tanba halo ona advokasia husi nivel nasionál to’o munisípál no postu administrativu sira, maibé tanba iha falla teknika mak presiza atu hein desizaun husi MS.
“Atu halo kampaña vasina HPV ne’e ami tama-sai eskola no bá komunidade. Ami fiar ba Grupu Suporta Inan sira tanba kada aldeia ema na’in-lima fásil atu halo prevensaun ba kankru serviks”, nia realsa.
Tuir dadus, estudante feto ho idade 11 to’o 14 ne’ebé atu simu vasina HPV hamutuk 3.708. Ba labarik feto sira la eskola ne’ebé sei simu vasina ne’e hamutuk 162, mai husi postu administrativu Fatululik, Fatumea, Fohorem, Tilomar, Maucatar, Suai no Zumalai.
Ministériu Saúde hahú, iha 23 Setembru, vasinasaun kontra HPV iha territóriu ba labarik sira atu prevene kankru kolu úteru.
Lembra katak iha 19 Jullu 2024, Governu hamutuk ho parseiru sira hanesan Organizasaun Mundiál Saúde, Fundu Nasaun Unida ba Labarik, Australian Aid, Aliansa Vasina, lansa ona vasina HPV iha Timor-Leste.
Notísia relevante: Servisu Saúde Munisípiu Viqueque lansa vasina HPV prevene kankru serviks
Jornalista: Celestina Teles
Editora: Maria Auxiliadora
