Fundasaun Alola ho ABAROLI diskute iha meza redonda empréstimu husi Governu
DILI, 24 setembru 2024 (TATOLI) – Fundasaun Alola hamutuk ho Estadu Direitu Asosiasaun Advogadu Amerikanu ka The America Bar Association Rule Of Law Initiative (ABA ROLI), ohin, hala’o diskusaun iha meza redonda kona-ba programa aprovizionamentu empréstimu husi Governu Timor-Leste.
Diretora Ezekutiva Fundasaun Alola, Maria Imaculada Guterres, hateten objetivu husi diskusaun ne’e koalia kona-ba programa aprovizionamentu empréstimu husi Governu Timor–Leste, atu hakbi’it feto maluk sira iha asesu ba Kréditu Suave/Kréditu Nasionál ne’ebé fasilita husi Ministériu Komérsiu no Indústria (MCI).
“Governu liuhosi Ministériu Komérsiu no Indústria daudaun ne’e fasilita programa Kréditu Suave/Kréditu Nasionál ba negosiante sira inklui emprezáriu feto sira, maibé sira ladún asesu ho di’ak, tanba ne’e diskusaun meza redonda ida-ne’e hala’o atu fahe hanoin konstrutivu oinsá atu fasilita feto emprezariál sira atu asesu ba kréditu ne’ebé mai husi Governu hodi apoia sira-nia negósiu iha diversifikasaun ekonomia Timor–Leste nian”, Diretora Ezekutiva Fundasaun Alola Maria Imaculada Guterres ba jornalista sira iha Timor–Plaza, tersa ne’e.
Ezekutiva ne’e akresenta katak iha diskusaun ne’e, parseiru sira aprezenta mós peskiza deskoberta ne’ebé halo husi Fundasaun Alola iha Munisípiu Bobonaro no Rejiaun Administrativa Espesial Oe-Cusse Ambeno (RAEOA).
“Diskusaun meza redonda ne’e mós atu aprezenta deskoberta peskiza husi Munisípiu Bobonaro no RAEOA ba Governu atu MCI bele konsidera oinsá bele fasilita feto emprezária sira iha asesu ba Kréditu Suave/Kréditu Nasionál hodi apoiu ba atividade negósiu, asegura diversifikasaun ekonómika iha Timor–Leste”, nia dehan.
Iha fatin hanesan, Country Lead ABAROLI, Januario Rangel, hateten ezisténsia husi ABAROLI iha Timor–Leste ne’e atu promove justisa, oportunidade ekonomia, dignidade umana liuhosi Estadu Direitu.
“Ami suporta Fundasaun Alola ho programa reforma legál no mós atu suporta sira, oinsá bele fasilita kapasitasaun iha hakbi’it ba emprezária feto sira, oinsá bele asesu ba kréditu hodi hala’o sira-nia negósiu bazeia ba justisa no demokrasia iha Timor–Leste’’, Januario afirma.
Vise Ministru Komérsiu no Indústria, Agusto Trindade Junior, hateten Governu prontu atu fasilita Kréditu Suave/Kréditu Nasionál liu husi Banku Nasionál Komérsiu Timor–Leste (BNCTL).
“Ita iha Programa Kréditu Suave no agora transforma ona ba Kréditu Nasionál, tanba ne’e Governu liuhosi MCI prontu atu fó apoiu ba negosiante sira inklui feto emprezária sira-nia negósiu iha diversifikasaun ekonomia Timor–Leste nian iha futuru’’, nia afirma.
Iha diskusaun meza redonda ne’e mai husi Asosiasaun Mulheres de Timor–Leste (AMTL), MCI, ABAROLI, parseiru servisu, Kámara Komérsiu no Indústria Timor-Leste (CCI- TL) inklui akadémiku sira iha Timor–Leste.
Jornalista : Felicidade Ximenes
Editór : Zezito Silva
