DILI, 24 setembru 2024 (TATOLI)–Sekretáriu Estadu Formasaun Profisionál no Empregu (SEFOPE), Rogerio Araújo Mendonça, hateten SEFOPE sei koordena ho Governu Nova Zeleandia iha tempu badak, atu Governu Timor-Leste bele haruka traballadór timoroan ba servisu iha nasaun ne’e.
Governante ne’e hateten, SEFOPE rona ona Embaixadora Timor-Leste nian ba Nova Zelandia, Idelta Rodrigues katak Governu Nova Zelandia iha vontade atu implementa programa ida hodi bele lori traballadór timoroan serbisu iha nasaun ne’e.
“Prosesu la’o di’ak tebes agora, tanba embaixada buka hela dalan ita atu diskute programa G to G, entaun hanesan ita haruka traballadór ba Austrália, tanba padraun ka rekezitu ba nasaun rua ne’e hanesan,” Rogerio Araújo Mendonça, hateten ba jornalista sira hafaoin halo lansamentu ba peskiza migrasaun traballadór timoroan iha Austrália no Korea Súl, iha Hotel Novu Turismu, Lecidere, tersa ne’e.
Sekretáriu Estadu ne’e dehan, SEFOPE sei hasoru malu ho ekipa unidade laborál Nova Zelandia nian atu diskute kona-ba haruka traballadór timoroan ba iha ne’ebá, molok asina nota entendimentu ida entre nasaun rua ne’e.
Antes ne’e, Embaixadora Timor-Leste nian ba Nova Zelandia, Idelta Rodrigues, seidauk iha akordu ruma entre nasaun rua ne’e maibé simu peididu ida husi Nova Zelandia hodi haruka traballadór timoroan sira ba iha ne’ebá, maibé presiza iha diskusaun ho ministériu relevante ba asuntu ne’e.
Tuir diplomata ne’e, Timor-Leste ho Austrália bele implementa programa ne’e haruka traballadór, tanba Timor-Leste iha esperiénsia haruka timoroan ba serbisu iha Austrália, Korea Súl no serbisu estajiáriu iha Japaun.
Idelta Rodrigues hateten, Nova Zelandia empeña atu apoiu situasaun ekonomia no sosiál reziéensia ba rejiaun pasífiku liuhusi mobilidade traballu atu haruka rendimentu ba sira-nia nasaun.
Iha Nova Zelandia, traballadór sira simu saláriu kada oras $24,97 Australia ne’ebé troka ba dolar Amérika nian ne’e ekivale liu rihun $10-resin.
Jornalista : Jesuína Xavier
Editór : Cancio Ximenes
