SEFOPE realiza feira kareira no edukasaun hodi hasa’e koñesimentu estudante sira iha Viqueque
VIQUEQUE, 24 setembru 2024 (TATOLI)- Sekretáriu Estadu Formasaun Profisionál no Empregu (SEFOPE), tersa ne’e, realiza feira karreira no edukasaun hodi hasa’e koñesimentu estudante sira nia iha munisípiu Viqueque atu asesu formasaun no kampu servisu.
Iha abertura, Diretór Jerál Formasaun Profisionál no Empregu husi SEFOPE, Carlito Rosário Cabral, dehan organiza feira kareira no edukasaun ho alvu ba estudante sekundáriu sira hodi haree asuntu dezempregu iha Timor Leste atu prepara joven sira hodi asesu ba kampu traballu.
Objetivu ba realizasaun feira karreira no edukasaun ne’e atu atinje futuru brillante liuhusi asesu ba informasaun karreira, rede profisionál, formasaun vokasionál, edukasaun, no programa servisu rai-laran no rai-li’ur.
“Programa ida-ne’e programa SEFOPE ne’ebé ami tau ba programa anuál tina-tinan realiza kada munisípiu sira. Maibé, ami planu tinan oin realiza mós iha postu izoladu sira, atu estudante sira bele asesu ba informasun sira-ne’ebé SEFOPE prepara”, Carlito Rosário Cabaral, hateten iha serimónia abertura feira karreira no edukasaun, iha resintu munisípiu Viqueque, ohin.
SEFOPE planu ba tinan 2025 atividade feira karreira no edukasaun sei hala’o iha postu sira-ne’ebé distánsia do’ok husi munisípiu.
Alende ne’e nia husu, autoridade munisípiu Viqueque nafatin koopera hamutuk SEFOPE hodi kria kondisaun ba joven Viqueque oan sira iha futuru.
Iha fatin hanesan, Sekretáriu munisípiu Viqueque, Acaçio de Sousa, haktuir liuhusi programa sira-ne’e hodi motiva estudante sira liga ba estudu atu estudante sira ramata sira-nia estudu bele iha koñesimentu asesu ba formasaun no estudu.
“Programa hakbesik ona mai ita, oinsá bele promove ita-nia joven sira asesu ba servisu. Nune’e ami husu SEFOPE kontinua kanaliza programa servisu ba joven sira iha munisípiu Viqueque”, nia afirma.
Iha biban ne’e, Prezidente Komisaun Organizadora Atuál Diretór SEFOPE Viqueque, Norberto Pereira Martins, informa, feira ne’e realiza tanba hetan apoia fundu rihun $8 husi Governu sentrál liuhusi SEFOPE.
Feira durante loron rua ne’e hetan partisipasaun husi instituisaun Autoridade Protesaun Sivil, CNE, grupu produsaun sira hamutuk 23 ne’ebé aprezenta produtu lokál, tais, livru no seluk tán.
SEFOPE konvida estudante sekundáriu sira hanesan sekundáriu Canosa Ossu, Sekundáriu Olokasa Ossu, Eskola Tékniku Vokasinál Kalo Hela Uatulari, Sekundáriu Calixa, Sekundáriu Santu Estevão Viqueque, eskola Kafê Viqueque, sekundáriu 4 Setembru Viqueque ho totál estudante na’in-1,129.
Jornalista : Vitorino Lopes da Costa
Editór : Florencio Miranda Ximenes
