DILI, 24 setembru 2024 (TATOLI)–Embaixadora Timor-Leste iha Austrália, Inês Almeida, hateten traballadór timoroan ne’ebé servisu iha Austrália ne’ebé sai husi sistema ne’e la’ós konsideradu servisu ilegál.
Timoroan sira-ne’e serbisu sai husi sistema konkordánsia entre Governu Austrália no Timor-Leste, liuliu Sekretaria Estadu Formasaun Profisionál no Empregu (SEFOPE) maibé sira uza viza protesaun temporária.
“Governu Austrália la klasifika sira illegal. Ita mak klasifika sira illegal. Sira iha bridging visa. Sira la’ós ilegál. Ba Austrália, bainhira ó laiha viza, sira la fó serbisu ba ó. Hakarak ka lakohi, sira la fó, nein kompañia ida brani atu fó serbisu. Labele dehan Governu Austrália fó toleránsia. Ninia prosesu mak hanesan ne’e,” Embaixadora Timor-Leste iha Austrália, Inês Almeida, hateten ba jornalista sira iha Novu Turizmu, nakait ho lansamentu relatóriu peskiza ida ba traballadór sira iha Austrália no Korea Súl.
Nia esplika sira sai husi sistema serbisu tuir akordu entre empreza australiana ho SEFOPE la’ós ilegál, tanba sira sai atu aplika temporary protection visa.
“Austrália fó bridging visa serbisu, sira serbisu no kontinua hatama osan mai Timor-Leste. Agora, sira-nia prosesu ne’e iha hela Governu Austrália nia liman, se sira-nia tempu ramata Governu Austrália tenke deside,” nia dehan.
Embaixadora ne’e esplika, kauza timoroan sira sai husi sistema katak traballadór sira-ne’e hetan viza servisu fulan sia (9) tuir akordu SEFOPE ho Governu Austrália.
“Tanbasá mak sira sai husi sistema, liuliu sira-ne’ebé hetan viza fulan sia (9) de’it. Sira serbisu oras la to’o. Empregadór sira kontinua diskonta ba transporte no balun ha’u hatene hetan $50 iha semana ida. Osan sira haruka mai Timor-Leste, entaun asuntu ida-ne’e tenke haree. Governu Austrália mak tenke haree ida-ne’e. Ami serbisu hamutuk ho Governu Austrália, oinsá atu hadi’a,” nia hateten.
Nia tatoli ba traballadór timoroan hotu-hotu atu hatudu komportamentu di’ak iha sira ida-idak nia serbisu fatin hodi bele serbisu ba família iha Timor-Leste,
“Ha’u sempre ko’alia ba sira, bainhira ita serbisu ema-nia rain, familia sira asina deklarasaun katak hatudu komportamentu di’ak atu ba serbisu iha ne’ebá. Maibé, husu sé bele, labele partisipa iha viza ho tempu badak,” nia dehan.
Tuir dadus husi SEFOPE katudu katak traballadór hamutuk 870 ne’ebé hahú husi 2012 to’o 2024 mak ses-aan husi sistema akordu koperasaun entre empreza australiana ho Governu timorense, atualmente iha traballadór timoroan hamutuk 4.090 mak serbisu iha Austrália.
Jornalista : Jasuína Xavier
Editór : Cancio Ximenes
