COVALIMA, 25 Setembru 2024 (TATOLI) – Organizasaun Naun-Governametál (ONG) Centro Comunidade Covalima (CCC) nia Programa ba Edukasaun oferese bolsa estudu ba joven no estudante finalista sira husi ensinu sekundáriu, ne’ebé mai husi família vulneravel, atu kontinua sira-nia kursu iha área ospitalidade no formasaun profesór ba ensinu báziku.
“Ami fahe informasaun tanba Centro Comunidade Covalima loke bolsa estudu hodi fó prioridade ba joven sira ne’ebé família vulneravel atu hasa’e sira-nia koñesimentu liuhusi edukasaun, nune’e bele hetan oportunidade hanesan ho ema seluk”, Jerente Programa CCC, Hilária do Carmo, dehan iha sede suku Labarai, postu Suai, ohin.
Responsavel ne’e apela ba joven no estudante finalista husi ensinu sekundáriu ne’ebé iha interese bele submete dokumentu, nune’e kompete iha vaga ne’e hodi hetan oportunidade atu hasa’e nivel edukasaun.
Kritéria atu submete dokumentu iha área formasaun profesór mak hanesan fotokópia diploma ensinu sekundáriu legalijadu orijinál tahan tolu, sertidaun RDTL tahan tolu, billete identidade tahan tolu, kartaun eleitorál tahan tolu, karta rekomendasaun orjinál husi xefe suku ka padre paróku tahan ida, atestadu médiku no fotokópia kaderneta ensinu sekundáriu nian.
Atu asesu bolsa ba área ospitalidade nia kritériu mak foto koloridu 3×4 tahan rua, fotokópia diploma ensinu sekundária, fotokópia sertidaun batizmu, sertidaun RDTL, kartaun eleitorál no billete identidade tahan ida, kartaun evidénsia husi SEPFOPE, atestadu médiku no karta rekomendasaun husi xefe suku katak kandidatu bolsa estudu mai husi família vulneravel.
Hilária do Carmo adianta katak bolsa estudu ba joven no estudante finalista ensinu sekundáriu ne’e presiza ema na’in-ualu – haat ba área formasaun profesór, ne’ebé sei hala’o estudu iha Baucau no haat seluk iha área ospitalidade, ne’ebé sei hala’o kursu iha sentru treinamentu Canossa Dili.
“Vaga bolsa estudu CCC hahú simu kandidatu sira ne’ebé atu submete sira-nia dokumentu iha loron 23 Setembru no sei remata iha 18 Outubru 2024”, informa.
Xefe Suku Labarai, Paulo de Xena, dehan komunidade sira presiza rona informasaun kona-ba oinsá atu asesu vaga ba bolsa estudu, tanba sira iha suku Labarai balun laiha kbiit atu apoia nia oan sira kontinua eskola.
“Ha’u seidauk iha dadus família vulneravel nia oan ne’ebé la kontinua sira-nia estudu. Ami identifika ona balun, maibé ho informasaun ne’ebé ha’u rona sei pasa informasun atu sira bele submete dokumentu iha Centro Comunidade Covalima”, nia realsa.
Jornalista: Celestina Teles
Editora: Maria Auxiliadora
