DILI, 25 setembru 2024 (TATOLI)–Diretór Ezekutivu Forum Organizasaun Naun Governamentál Timor-Leste (FONGTIL), Valentim da Costa Pinto, husu ba deputadu sira iha Parlamentu Nasionál hodi fo prioridade ba povu nia moris di’ak iha setór oioin.
Nia hateten, deputadu sira tenke fó ezemplu hodi aloka orsamentu ba iha nesesidade povu nian atu bele hetan moris di’ak, tanba sei iha problema sosiál barak ne’ebé Governu presiza rezolve nesesariamente.
“Ita iha numeru dezempregu barak, sistema saúde no edukasaun la’o kadik hela, ida ne’e hatudu katak presiza osan hodi investe hodi halo mudansa ruma. Labele aprova osan ba sira-nia aan. Sira iha kondisaun natoon no iha privilejiu boot ona,” Diretór Ezekutivu Forum Organizasaun Naun Governamental Timor-Leste (FONGTIL), Valentim da Costa Pinto, hateten ba jornalista sira hafoin semináriu nasionál ho tema “Diálogu nasional esforsu ba planeamentu investumentu no advokásia ne’ebé intergradu ba melloramentu sistema bee no saneamentu no ijene”, iha Manleuana.
Iha rekursu finanseiru sufisiente, nia dehan, entaun tenke jere didi’ak hodi bele investe iha setór sira-ne’ebé enfrenta problema iha Timor-Leste.
“Ita iha osan natoon, millaun $18 iha Banku Sentrál, entaun tenke jere didi’ak osan sira-ne’e hodi responde dezafiu sira-ne’e iha baze. Deputadu sira presiza duni karreta maibé Parlamentu Nasionál presiza halo sakrifisiu uitoan hodi fó prioridade ba povu nia interrese tanba sira reprezenta povu. Ita-nia povu la’o kadik, deputadu sira-nia demanda barak loos hodi aprova osan ba sira-nia aan uluk. Ida lahatudu jestu no sentimentu ne’ebé reprezenta nu’udar deputadu, reprezentante povu no tilun no matan povu nian,” nia dehan.
Sosiedade sivil, hanesan FONGTIL nia pozisaun mantein nafatin hodi la konkorda hanesan tinan 15 liubá, ne’ebé reprezentante povu sira tau prioridade ba sira aan hodi sosa karreta ne’e, FONGTIL la konkorda.
Antes ne’e, Prezidente Repúblika, José Ramos Horta husu ba deputadu sira hodi sosa karreta ne’ebé iha kualidade maibé folin baratu, hodi bele redús kustu ba akizisaun karreta ba deputadu/a sira.
Jornalista : Jesuína Xavier
Editór : Cancio Ximenes