DILI, 25 setembru 2024 (TATOLI)—Governu liuhusi reuniaun Konsellu Ministru (KM) ordinária aprova projetu rezolusaun ne’ebé aprezenta husi Ministru Prezidénsia Konsellu Ministru ein ezersísiu, Adérito Hugo da Costa no husi Prezidente Komisaun Funsaun Públika (KFP), Agostinho Letêncio de Deus.
Diploma ne’e kona-ba fiksa vaga ba promosaun pesoál integradu iha rejime jerál karreira administrasaun públika ba tinan 2024.
“Vaga sira ba promosaun ne’e fiksa ona tinan-tinan husi Governu, tuir proposta KFP to’o limite pursentu 10 husi totál pesoál sira iha kada kategoria ka grupu profisionál,” referidu nota ezekutivu ne’ebé Agência Tatoli asesu hafoin reuniaun KM, iha Palásiu Governu, kuarta ne’e.
Husi totál vaga promosaun hamutuk 817 ne’ebé rezolusaun Governu ne’e estabelese, kategoria Tékniku Superiór iha 47 – Grau A, Tékniku Superiór iha 122 – Grau B, Tékniku Profisionál iha 188 – Grau C, Tékniku Profisionál iha 234 – Grau D, Tékniku Administrativu iha 149 – Grau E no Asistente iha 77 – Grau F.
Notísia relevante : Governu aprova vaga promosaun karreira administrasaun públika hamutuk 866
Aleinde ne’e, KM apresia inisiativa ba kriasaun sistema promosaun bazeia ba antiguidade ba funsionáriu públika sira.
Ezekutivu sira halo apresiasaun inisiál ida kona-ba inisiativa atu kria sistema promosaun bazeia ba antiguidade ba funsionáriu públiku sira. Tanba liuhusi inisiativa ne’e bele garante progresu karreira.
“Objetivu husi inisiativa ida-ne’e mak atu garante progresaun karreira ba sira tanba razaun oin-oin, la hetan promosaun bazeia ba méritu iha tinan hirak ikus ne’e, bazeia ba kritériu sira hanesan antiguidade, dezempeñu, idade, formasaun profisionál, serbisu iha área remota, komportamentu di’ak no asiduidade,” nota ezekutivu fó sai.
Jornalista : Osória Marques
Editora : Julia Chatarina
