DILI, 25 setembru 2024 (TATOLI)—Komisaun A trata asuntu Justisa no Konstitusionál iha Parlamentu Nasionál (PN), kuarta ne’e, simu audiénsia ho Plan Internasionál hamutuk ho Asosiasaun Halibur Ema ho Defisiénsia iha Timor-Leste (AHMDTL) no ARCO-IRIS, atu promove ema ho defsiénsia (EhD) no LGBTI sira-nia direitu.
“Ohin, ami ho ekipa mai enkontru hamutuk ho komisaun A, ho objetivu ida de’it, hodi ko’alia ka diskute kona-ba oinsá mak ita promove direitu umanu liuliu ba Ema ho Defisíensia (EhD) no ema ho lesbian, gay, bisexual, transgender, and intersex (LGBTI) iha Timor-Leste,” Jestór ba Programa Diversidade no Inkluzaun iha Plan International, Talia Soares, hateten ba jornalista sira hafoin ramata enkontru iha sala komisaun A iha PN.
Tanba, nia dehan, dalabarak iha sosiedade nia leet ne’e Ema ho Defisiénsia no ema ho LGBTI sira-ne’e mak hetan diskriminasaun barak liuliu iha família no sosiedade, nune’e liuhusi kolaborasaun ho komisaun A ne’e bele haree asuntu sira-ne’e.
Tuir Nia, iha konstituisaun artigu 16 parte daruak hateten katak “Ita la haree ba ita-nia étnika no ita tenke envole ema hotu-hotu inklui ema diversidade ho Ema ho Defisiénsia iha ita-nia rai.
Diretór Ezekutivu AHMDTL, Gabriel de Sousa, hateten AHMDTL nu’udar organizasaun nasionál ida-ne’ebé defende direitu Ema ho Defisiénsia (EhD) sira-nia direitu moris hanesan sosiedade iha Timor-Leste.
Durante sorumutu ne’e, nia dehan, sira-nia parte hato’o rekomendasaun liuliu oinsá komisaun A bele halo fiskalizasaun ba lei hirak ne’ebé mak ladún kondisiona ho Ema ho Defisiénsia (EhD) sira.
“Ezemplu, iha lei númeru 19/2008, ne’e termu balun ne’ebé mak impede hela EhD no dekretu-lei númeru 53/2022, revoga fali lei ne’e iha 2024 ne’e limitasaun ba partisipasaun liuliu EhD. Entaun, ida-ne’e mak ita-nia rekomendasaun,” nia dehan.
Sira rekomenda mós atu oinsá mak ko’alia kona-ba polítika inkluzivu liután, kria asesível liuliu rampa ba movimentu EhD nian iha fatin públiku no instituisaun sira-ne’e, liga ho konvensaun internasionál direitu EhD ne’ebé mak TL ratifika tiha ona.
Rekomendasaun sira ne’e atu bele asegura nafatin labarik ho defisíensia no EhD atu bele partisipa iha setór hotu ho movimentu livre.
“Ohin, resposta pozitivu ida mak parte komisaun A sei halo diskusaun ba termu invalidés no mós asuntu sira seluk, tanba sira (komisaun) bele rona. Maibé, sei ezekuta husi parte Governu nian,” nia hateten.
Jestór Projetu husi ARCO-IRIS, Luis Araújo Pinto, hateten hasoru malu ho komisaun ne’ebé trata asuntu Justisa no Konstitusionál ne’e, hanoin objetivu klaru atu mai advokásia ho órgaun lejislativu ne’e no aprezenta ba PN oinsá mak moris komunidade LGBTI hasoru iha sira-nia moris loro-loron liuliu iha sosiedade.
Asuntu sira-ne’e mak sira aprezenta ba PN liuhusi komisaun A, ne’ebé mai ho rekomendasaun sira importante liu mak atu haree lei ruma oinsá haree ba ezisténsia maluk komunidade LGBTI iha Timor-Leste ne’ebé dalaruma sira sempre hetan diskriminasaun iha sira-nia moris.
Tanba, nia hateten, haree ba papél PN ne’ebé atu proteje no respeita, promove sidadaun hotu-hotu inklui komunidade LGBTI.
“Ne’ebé, husi enkontru ne’e, hanoin komisaun bele sensível tebes hodi simu ita, atu diskute no saida mak ita hato’o ne’e komisaun mós tau ba iha sira-nia ajenda, ne’e parte di’ak ida,” nia dehan.
Entretantu, iha enkontru ne’e prezide direta husi Prezidente komisaun A, Patrocínio dos Reis Fernandes no akompañadu husi Deputadu membru komisaun A ninian.
Jornalista : Nelson de Sousa
Editór : Cancio Ximenes
