DILI, 25 setembru 2024 (TATOLI)—Konsellu Administrasaun Fundu Dezenvolvimentu Kapitál Umanu (FDCH, sigla portugés) sei haree filafali lista bolsa parsiál hafoin mak foti desizaun tanba iha bolseiru balun mak la asina kontratu tanba la aseita ho desizaun foun.
Konsellu Administrasaun FDCH kompostu husi ministériu lima hanesan Ministru Planeamentu no Investimentu Estratéjiku nu’udar Prezidente, enkuantu Ministru Ensinu Superiór, Siénsia no Kultura, Ministra Finansa, Ministru Justisa, Ministru Petróleu no Rekursu Minerál inklui Sekretáriu Estadu Formasaun Profisionál no Empregu nu’udar membru permanente.
“Ha’u foin simu relatóriu horiseik tanba ha’u foin to’o horibainrua, ha’u tenke lee livru tiha lai, o que certo prosedimentu ne’ebé kria bolsa hakbiit ne’e la’ós ami hapara, maibé haree ba oin sei la’o oinsá, ami Konsellu Administrasaun sei deside filafali, kontribuisaun ne’e oinsá. Tanba desizaun hotu-hotu husi ministériu lima no Sekretáriu Estadu ida tuur hamutuk mak foti desizaun, ha’u labele foti desizaun mesak,” Prezidente Konsellu Administrasaun FDCH no atuál Ministru Planeamentu no Investimentu Estratéjiku, Gastão Francisco de Sousa, hateten iha resintu Palásiu Governu, kuarta ne’e.
Programa ne’e iha entre ligasaun bazeia ba nota no ida-ne’e ho loloos mak foin bele asesu ba programa.
“Programa bolsa hakbiit ne’e katak atu foti sa’e ita-boot, maibé ita-boot moris di’ak hela oinsá ha’u fó bolsa ba ita-boot, ita iha direitu bele asesu, maibé tenke haree ba nota,” nia akresenta.
Notísia relevante : Bolseiru 2.400-resin ba programa bolsa parsiál asina ona kontratu ho Governu
Iha sorin seluk, estudante ne’ebé sai benefisiáriu ba bolsa parsiál asina ona kontratu ho Governu.
“Kona-ba bolseiru parsiál ne’e na’in-2.400-resin mak asina ona kontratu no ita mós selu ona sira-nia propina hanesan Cristal, Universidade Katólika Timorense (UCT, sigla portugés) no seluk tan,” Diretór Ezekutivu FDCH, Júlio Aparício, informa.
Enkuantu, estudante na’in-500 seidauk asina nune’e FDCH sei la’o tuir regra aplikável.
“Agora ami rejistu ne’e 2.400-resin. sira-neʼebé la asina, ami la’o tuir de’it regra, katak kuandu taka ona mak laiha opurtunidade,” nia tenik.
Programa bolsa parsiál bazeia ba diploma ministeriál númeru 78/2021 10 novembru relasiona ho rejime atribuisaun bolsa estudu ba frekuénsia iha territóriu nasionál no regulamentasaun pedidu individuál apoiu finanseiru ba estudu iha ensinu superiór akreditadu nasionál.
Programa ne’ebé oferese husi FDCH ne’e só fó apoiu de’it ba kustu propina estudante nian to’o konklui estudu no sei la kobre selu kustu sira seluk hanesan kustu moris, alojamentu no kustu didátiku.
Enkuantu, bolsa hakbiit define kada bolseiru sei hetan kustu vida $120 kada fulan hodi kobre sira-nia alojamentu, transporte, alimentasaun no ekipamentu didátiku. Enkuantu, ba propina nian Governu sei transfere direita ba konta bankária universidade ne’ebé benefisiáriu sira hala’o estudu.
Tanba ne’e, iha bolseiru balun la konkorda ho Governu nia desizaun halakon bolsa hakbiit no ajusta hotu ba bolsa parsiál tanba finansiamentu kobre ba popinas de’it, enkuantu nesesidade seluk estudante rasik mak kobre.
Jornalista : Osória Marques
Editora : Julia Chatarina
