DILI, 25 setembru 2024 (TATOLI) – Ministériu Transporte no Komunikasaun (MTK) hein konfirmasaun husi Empreza Indonézia PT Waskita Karya (Persero) TBK atu halo lansamentu ba konstrusaun pista aviaun ba Aeroportu Internasionál Prezidente Nicolau Lobato Comoro (AIPNL).
“Ami hein Waskita nia konfirmasaun, ha’u hasai ona avizu, kontinua ba Waskita no konsultan PMC (Reprezentante Empreza Konsultória Indonézia, PT Amythas IN JV Meinhardt PCM), ami hein konfirmasaun husi sira, tanba sira sei halo hela konstrusaun ne’e”, Ministru Transporte no Komunikasaun, Miguel Marques Gonçalves Manetelu, esplika ba jornalista sira iha Palásiu Governu, ohin.
Nia dehan, iha kontestu kontratu Governu nian mak dokumentu ofisiál ida ne’ebé fó sai husi autoridade kontratante ida hodi notifika fornesedór servisu ka kontratór ida katak sira selesionadu ba projetu ida no katak sira bele hahú serbisu hanesan espesifikasaun iha kontratu.
Ministru Miguel hatete katak enkontru kick off ba lansamentu konstrusaun pista AIPNL nian tuir loloos realiza ona iha loron 13 fulan-Setembru tinan 2024, maibé Kompañia PT Waskita Karya (Persero) TBK hosi Indonézia husu atu fó tempu hodi halo revizaun ba kontratu.
“Ami seidauk bele konfirma bainhira maka sei lansa. Hafoin fó sai NTP, etapa tuirmai tenke iha enkontru kick off ne’ebé sei partisipa, la’ós de’it hosi empreza kontratadu sira no konsultór sira maibé mós JICA, ADB no MTK, hafoin prosesu bele hahú”, nia hatete.
Governante ne’e afirma, enkontru kick off maka enkontru dahuluk projetu nian ho objetivu atu asegura katak ema hotu ajusta sira-nia persepsaun. Aleinde ida-ne’e, enkontru ne’e funsiona atu asegura katak membru ekipa ida-idak komprende sira-nia papél.
Rekorda fali katak iha loron 21 fulan-Agostu, Governu Timor-Leste, liuhusi MTK, konkorda atu kontinua kontratu ho empreza Indonézia PT Waskita Karya (Persero) TBK hodi halo konstrusaun ba pista AIPNL Comoro.
Miguel Marques Gonçalves Manetelu, subliña Governu lakohi loke konkursu foun tanba Governu anteriór ne’ebé lidera hosi antigun Primeiru-Ministru, Taur Matan Ruak asina tiha ona kontratu ho PT. Waskita Karya (Persero) TBK.
Iha komunikadu imprensa ida hosi Governu iha loron 16 fulan-Agostu tinan 2024, hatete katak desizaun ne’e foti hafoin halo análize kuidadu ba arranju kontratuál sira ba projetu ne’e no tuir objetivu atu dezenvolve Planu Mestre ida ba AIPNL iha Dili no kompleta ninia espansaun, inklui pista no asegura kondisaun sira ne’ebé nesesáriu ba aeroportu ne’ebé nia iha kapasidade atu akomoda pasajeiru millaun ida resin kada tinan ho padraun seguransa nian ne’ebé aas liu, ne’ebé estipula iha Programa Governu Konstitusionál IX.
Ho espansaun pista nian ne’ebé sei hala’o iha etapa tolu, aeroportu sei bele simu aviaun sira ne’ebé boot liu, hodi hadi’a maka infraestrutura sira ne’ebé iha. Etapa dahuluk maka atu habelar pista ne’ebé iha ona hosi metru 1.850 ba metru 2.100.
Iha etapa daruak, pista sei hanaruk metru 400 ba diresaun tasi, hodi halo komprimentu totál ba metru 2.500. Ikus liu, iha etapa datoluk, pista sei hanaruk tan metru 500 iha diresaun kontráriu, hodi lori komprimentu totál ba metru 3.000.
PT Waskita Karya (Persero) Tbk maka empreza estatál Indonézia nian ne’ebé hala’o operasaun iha setór konstrusaun nian. Hala’o nia negósiu, empreza ida-ne’e iha divizaun lima, maka Edifísiu, Infraestrutura I, Infraestrutura II, EPC no Ultramarinu. Atu apoia ninia atividade negósiu, empreza ne’e mós iha filiál sanulu-resin-ida ne’ebé namkari iha Indonézia laran tomak.
Jornalista : Felicidade Ximenes
Editór : Zezito Silva
