COVALIMA, 25 Setembru 2024 (TATOLI) – Autoridade munisípiu Covalima, liuhusi reuniaun konsellu koordenasaun munisipál rekomenda ba servisu delegasaun Sekretaria Estadu Formasaun Profisionál no Empregu (SEFOPE) atu aprezenta dadus Covalima-oan ne’ebé servisu iha Austrália no Koreia Súl.
Prezidente Interinu Konsellu Koordenasaun Munisipál, Alberto Moniz de Araújo, hateten tuir Dekretu-lei númeru 84/2023, 23 Novembru, iha kinta alterasaun husi Dekretu-lei númeru 3/2016, 16 Marsu, iha artigu 41 katak hala’o reuniaun konsellu koordenasaun fulan ida dala ida.
Nune’e, reuniaun konsellu koordenasaun iha setembru ne’e, servisu delegasaun SEFOPE mak halo aprezentasaun ba planu no programa ne’ebé durante ne’e implementa, hahú iha trimestre dahuluk to’o datoluk nian.
“Iha aprezentasaun máteria, autoridade rekomenda ba SEFOPE atu hato’o dadus fiksu, nune’e ita bele hatene traballadór sira ne’ebé serbisu iha rai-li’ur, tanba sira mós konstribui reseita mai iha ita-nia rai”, Alberto de Araujo dehan hafoin reuniaun, ohin.
Autoridade husu SEFOPE Covalima aprezenta dadus, tanba iha reuniaun konsellu ne’e hato’o de’it nia programa hanesan formasaun iha área ospitalidade, administrasaun, agrikultura no treinamentu tékniku sira.
Aleinde ne’e, iha 2024, SEFOPE aumenta nia programa hodi loke tan sentru formasaun lian inglés ba joven-sira iha munisípiu, nune’e bele responde ba merkadu traballu nasionál no internasionál.
Diretór SEFOPE Covalima, Stefanus Segundo Manek, konsidera rekomendasaun husi autoridade Covalima atu aprezenta dadus traballdór ne’ebé serbisu iha Austrália no Koreia ne’e importante.
“Ha’u rekoñese SEFOPE Covalima seidauk iha dadus, maibé ha’u esforsu bainhira reuniaun konsellu koordenasaun sei aprezenta ba autoridade sira atu hatene dadus Covalima-oan ne’ebé serbisu iha rai-li’ur”, nia promote.
Tuir dadus, kandidatu traballadór Covalima atu bá serbisu iha Australia iha na’in-3.185, husi númeru ne’e traballdór ne’ebé nia valór di’ak hamutuk 658 no valór sufisiente 1.932 mak sei tuir formasaun lian inglés.
Jornalista: Celestina Teles
Editora: Maria Auxiliadora
