COVALIMA, 25 Setembru 2024 (TATOLI) – Servisu Munisipál ba Seguransa Alimentár implementa ona programa tolu mak halo monitorizasaun bá armazein loja nian, bá merenda eskolár no disemina informasaun kona-ba pratika ai-han saudavel iha nivel postu administativu.
Diretór Servisu Munisipál ba Seguransa Alimentar, Hilário Oliveira Mendonça, esplika Planu Asaun Anuál (PAA) 2024 nian iha programa haat no husi ida ne’e realiza ona tolu no falta ida mak seidauk implementa.
“Tama ona trimestre datoluk no programa ne’ebé ami seidauk implementa mak teste ba bee posu ne’ebé populasaun sira konsome atu hatene bee ne’ebé kontamina ho baktéria. Ida ne’e sei implementa iha trimestre dahaat”, Domingos Medonça dehan iha bairru Costa, ohin.
Dirijente ne’e hateten programa monitorizasaun ba armazein loja nian ho intensaun atu haree kondisaun rai sasán ne’ebé sidadaun sira konsome no monitoriza restaurante sira iha Covalima hodi haree nia ijiene, tanba liga ba ema nia saúde.
Atividade monitoriza Programa Merenda Eskolár ne’e ekipa seguransa alimentár identifika ekipa jestaun programa (EJP) la koopera atu sosa agrikultór sira-nia produtu hanesan modo-tahan no seluk tan.
Aleinde ne’e mós, programa disemina informasaun mak halo promosaun ba seguransa alimentár liga ba pratika ai-han saudavel ne’ebé hala’o iha postu administrativu Fatululik, Fatumea no Fohorem, tanba komunidade seidauk iha koñesimentu di’ak ba ai-han lokál ne’ebé prodús hodi fó nutrisaun.
Domingos Sequeira salienta katak Servisu Saúde Covalima hamutuk ho parte seguransa alimentár halo monitorizasaun ba Programa Merenda Eskolár, ne’ebé iha terrenu identifika falta stock produtu lokál, nune’e obriga EJP sosa sasán iha loja.
Jornalista: Celestina Teles
Editora: Maria Auxiliadora
