Alargamentu mini ICU prioritáriu ba HNGV iha 2025
DILI, 26 setembru 2024 (TATOLI) – Diretora Servisu Administrasaun Finansa no Lojístika, iha Hospitál Nasionál Guido Valadares (HNGV), Sara Maria Xavier, hateten alargamentu mini ICU sai prioridade ba ospitál nasionál iha 2025, aleinde akizisaun medikamentu no fasilidade ospitalár.
“Orsamentu ne’ebé mak prevee ba tinan 2025, ita haree liu ba kompra médikamentu klinikál sira inklui mós halo alargamentu ba edifísiu, ezemplu; hanesan ita sei loke tan espasu balun, unidade mak mini ICU hodi bele fó tratamentu di’ak ba ita-nia populasaun sira”, Sara Maria Xavier, informa iha nia kna’ar fatin HNGV, ohin.
Sara dehan, osamentu ne’ebé mak aloka ba HNGV iha tinan 2025 hamutuk millaun $14-resin, fahe ba kategoria haat, hanesan saláriu vesimentu, bens servisu, kapitál menor no kapitál dezevolvimentu.
“Ita sei hola medikamentu sira inklui mós halo alargamentu ba edifísiu, liuliu espasu ba unidade mini ICU nian, tanba neste momentu ita-nia ICU iha kama neen de’it, entaun labele responde ba populasaun Timor-Leste”, nia esplika.
Nia afirma, HNGV destaka importánsia atu sosa fasilidade médiku ho objetivu atu redús mós ttransferénsia pasiente ba ba rai li’ur.
Joranlista : Felicidade Ximenes
Editór : Zezito Silva
