DILI, 26 setembru 2024 (TATOLI)–Diretór Nasionál Ortikultura iha Ministériu Agrikultura, Peska, Pekuária no Floresta (MAPPF), Lúcio Ramiro Ribeiro, hateten diresaun nasionál MAFPP nian halo hela intervensaun ho karosa rua ba agrikultór sira iha Uatucarbau-Uatulari, Viqueque ne’ebé enfrenta udan boot hodi estraga sira-nia hare iha natar laran.
“Karosa hamutuk haat ba iha Viqueque, rua apoia ba iha Uatucarabau no rua ba iha Uatulari. Nia objetivu ne’e hodi lalin agrikultór sira nia hare ne’ebé hetan inundasaun husi udan makaas ne’e,” Diretór Nasionál Ortikultura iha Ministériu Agrikultura, Floresta, Peska no Pekuaria (MAFPP), Lúcio Ribeiro, hateten ba Agência Tatoli, kinta ne’e.
Diretór ne’e hateten, agrikultór barak hetan inundasaun ba sira natar no hare ne’ebé hetan estragu, tanba udan makaas tebes ne’ebé kauza ba estragu ne’e iha semana liuba.
Lúcio Ribeiro relata, agrikultor sira-nia natar nakonu ho hare liu hektar 100 ida mak hetan estragu, no MAFPP kontinua fó apoiu liuhusi karosa ne’e hodi bele ajuda foti sai hare iha natar laran ba rai-maran.
“Sira-nia hare balun bee lori tiha iha Uatulari no Uatukarabau ne’e,” nia dehan.
Jornalista : Jesuína Xavier
Editór : Cancio Ximenes
