DILI, 26 setembru 2024 (TATOLI)–Ministériu Agrikultura, Peska, Pekuária no Floresta (MAPPF), prepara hela fini hodi bele distribui ba agrikultór sira iha fulan-outubru no novembru tinan ida-ne’e, hodi bele kuda iha natar no toos iha territóriu ba epoka udan tinan ida-ne’e.
Diretór Nasionál Ortikultura iha Ministériu Agrikultura, Peska, Pekuaria no Floresta (MAPPF), Lúcio Ramiro Ribeiro, hateten fini sira-ne’ebé ministériu prepara ne’e kompostu husi batar tonelada 80 no haree tonelada 100.
“Fini haree no batar ne’e, ita prepara ba munisipiu hotu-hotu, exeptu Rejiaun Administrativu Espesiál Oé-Cusse Ambeno (RAEOA). Preparasaun fini nia objetivu ne’e fahe ba agrikultór sira iha tinan ida-ne’e atu kuda fali,” Lúcio Ramiro Ribeiro, hateten ba Agência Tatoli, kinta ne’e.
Diretór ne’e hateten, daudaun ne’e iha hela prosesu kompra husi kompaña hodi bele halo distribuisaun fini sira-ne’e ba agrikultór iha munisipiu sira iha fulan outubru nia rohan.
“Fini batar ne’e sei halo distribuisaun iha fulan-outubru nai rohan no fini hare ne’e sei distribui iha fulan-novembru ba agrikultór sira (besik tempu udan),” nia dehan.
Aleinde ne’e, MAPPF mós prepara pestisida no adubu ba agrikultór sira hodi kombate peste sira-ne’ebé bele estraga plantasaun hanesan hare, batar no modo sira.
Tuir nia, MAPPF aloka ona orsamentu hamutuk rihun $60 hodi sosa ona ai-moruk ka pestisida hodi kombate peste sira iha Indonézia no distribui ona ba munisipiu sira.
“To’o mai rai iha armazen nasionál maibé ita fahe hotu ona,” nia hateten.
MAPPF mós distribui ona fini modo ba agrikultór sira iha munisípiu hotu ne’ebé sosa ho valór osan hamutuk rihun $50 ne’ebé distribui hotu ona iha tinan ne’e.
“Ami fahe diresaun agrikultór sira iha munisipiu, depois mak distribui ba nia agrikultór sira,” nia dehan.
Jornalista : Jesuína Xavier
Editór : Cancio Ximenes
