MKI sosializa dekretu-lei lisensiamentu komersiál
VIQUQUE-26 setembru 2024 (TATOLI)-Ekipa husi Ministériu Komérsiu Indústria (MKI) kuarta ne’e, sosializa dekretu-lei nú.89/2023, fulan-dezembru kona-ba lisensiamentu setoriál atividade komersiál ba autoridade munisípiu no emprezáriu lokál sira iha munisípiu Viqueque.
Iha programa sosializasaun ne’e, ekipa MKI mós sosializa ba autoridade munisípiu no emprezáriu lokál sira kona-ba dekretu-lei Nú°.90/2023, 27 fulan-dezembru kona-ba lisenciamentu industriál no dekretu-Lei nú; 91/2023, 27 fulan-dezembru baze industriál.
Reprezentante hosi Ministru Komérsiu Indústria (MKI), Gabriel J.M.F da Costa, esplika, MKI, liuhusi Diresaun Jerál Komérsiu, koopera hamutuk ho Presidente Autoridade Munisípiu Viqueque hodi realiza programa sosializasaun ba dekretu lei ne’e atu autoridade munisipál no emprezáriu sira bele intende ho didiak kona-ba mudansa servisu no alterasaun dekretu lei ne’e rasik.
“Uluk Lisensiamentu ne’e Servisu Rejistu Verifikasaun Ekonómika, Institutu Públiku (SERVE, I.P) fó lisensa ba empreza sira, maibé dekretu lei ne’e mosu agora daudauk lisensa komersiál MKI mak sei fó ba empreza sira, maibé MKI sei servisu hamutuk ho SERVE, I.P oinsá kanaliza prosedimentu trata dokumentu lisensa,” nia hateten iha salaun administrasaun Viqueque ohin.
Iha fatin hanesan Sekretáriu Munisípiu Viqueque ba Asuntu Sosiál, Acasio de Souza, haktuir liuhusi sosilizasaun ida ne’e sei fasilita autoridade munisipál, emprezáriu no komunidade sira atu trata dokumentu ne’ebé liga ho atividade komersiál iha futuru.
“Ha’u husu ba negosiante sira Viqueque tenke iha lisensa maka hala’o atividade negósiu, bazeia ba dekretu lei ne’ebé ita iha no hatutan ba komunidade sira seluk ne’ebé hala’o negósiu,” nia hateten.
Programa sosilizasaun ne’e hetan partisipasaun hosi autoridade lokál, veteranu, Komandante Polísia Nasionál Timor Leste (PNTL) munisípiu Viqueque no komadante eskuadra sira no emprezariu sira iha munisípiu Viqueque.
Jornalista : Vitorino Lopes da Costa
Editór : Agapito dos Santos
