Viqueque seidauk submete relatóriu ezekusaun orsamentu durante vizita Papa Francisco
VIQUEQUE, 26 setembru 2024 (TATOLI)-Prezidente Komisaun Organizadora vizita Sua Santidade Papa Francisco hosi munisípiu Viqueque, Francisco Cruz S. de Gonzaga Soares, informa ninia parte to’o oras ne’e seidauk submete relatóriu ezekusaun orsamentu hamutuk rihun $ 40 ne’ebé maka alokadu hosi Governu sentrál hodi ezekuta durante vizita Sua Santidade Papa Francisco mai Timor-Leste.
Atuál Prezidente Autoridade Munisípiu Viqueque ne’e dehan, totál peregrinu hosi postu adminsitrativu 5 hamutuk 6.261 maka rejistu hodi partisipa selebrasaun misa solene ne’ebé direje diretamente husi Amu Papa Francisco iha loron 10 fulan-setembru 2024 iha Tasi-Tolu Dili.
“Husi orsamentu ne’e ita fahe ba item rua ne’ebé orsamentu $ 20.000,00 ba tranporte no $ 20.000,00 ba konsumu, maibé komisaun diskute hodi haree orsamentu ba transporte la sufisiente, ne’ebé fofoun ne’e ami hanoin karreta peregrinu sira mak oferese voluntáriu, depois ami ense mina ne’ebé ami tau ho montante $ 150,” Francisco Cruz S. de Gonzaga Soares, hateten ba Agência Tatoli, iha ninia knaar fatin, kuarta ne’e.
Nia esplika husi totál peregrinu rihun 6.261 persiza karreta hamutuk unidade 209, maibé bainhira atu tula peregrinu sira ne’e bá Dili, karreta 79 maka konfirmadu no karreta seluk retira ho rajaun kustu$ 150 ne’ebé maka komisaun aloka la sufisiente atu ense mina hodi transporta peregrinu sira bá kapitál nasaun.
“Nune’e iha momentu ne’ebá ha’u informa ba Ministru Agrikultura Peska, Pekuária no Floresta (MAPPF), Marcos da Cruz, ami na’in rua deskute hodi deside hasa’e folin transporte ba $ 250 ba postu Uatucarbau, Uatulari no Lacluta, Viqueque Vila no Ossu kustu kada karreta ida $ 200, hafoin hasa’e kustu foin mak ami hetan karreta unidade 180, maibé la to’o nafatin, tanba presiza tán karreta 30, nune’e ha’u koordena tan Ministru Agrikultura mak apoia transporte karreta unidade 11 hodi tula peregrinu husi Viqueque ba Dili,” nia hateten.
Kona-ba orsamentu ne’ebé alokadu be item konsumu, tuir nia katak Komisaun munisipál aloka ba kada postu administrativu ho orsamentu hamutuk $ 1.500 atu responde ba hahán bainhira peregrinu sira hela iha fatin akampamentu Hera.
“Komisaun nivel munisípiu Viqueque aloka orsamentu ba komsumu nian kada postu ida aloka $1.500 hodi prepara hahan lori ba Dili peregrinu sira han, ita garantia ba komisaun nasionál no Kámara Komérsiu Indústria Timor Leste (CCI-TL, sigla portugés) no Dioseze maka fó hahán ba ita-nia peregrinu sira, maibé to’o iha Dili la akontese, ita simu de’it foos saku 150,” nia relata.
Nia dehan, maske la hetan apoiu hahán husi Komisaun Nasionál no Dioseze durante hela iha akampamentu Hera, maibé peregrinu sira hetan apoiu lojistik hosi Ministru Agrikultura Peska, Pekuária no Floresta (MAPPF), Marcos da Cruz, Ministru Interiór, Francisco da Costa Guterres, Vise MNEK, Milena Maria da Costa Rangel, MSSI, Verónica das Dores, no Sekretáriu Estadu Floresta, Ferdinando Vieira Vise MSSI Céu Brités.
“Maske oituan ka barak sira maka apoia ita-nia peregrinu sira hosi munisípiu ida-ne’e hodi responde ba komsumu durante iha Dili, daudauk ne’e ha’u sei hein hela relatóriu kada postu relata hotu mai munisípiu hafoin ha’u relata ba komisaun nasionál kona-ba ezekusaun orsamentu ne’ebé aloka mai Viqueque,” nia akresenta.
Tuir dadús peregrinu husi munisípiu Viqueque ho totál hamutuk rihun 6.261 mai husi postu administrativu lima kompostu postu Viqueque rihun 2.298, Ossu na’in-956, Uatulari rihun 1.471, Uatucarbau 522 no Lacluta rihun 1.014.
Entretantu, Papa Francisco hala’o ninia vizita apostolika iha Timor-Leste iha loron 9 to’o 11 fulan-setembru 2024.
Jornalista : Vitorino Lopes da Costa
Editór : Agapito dos Santos
