AIFAESA, I.P halo inspesaun ba loja no kioske iha Viqueque
VIQUEQUE, 27 setembru 2024 (TATOLI)-Autoridade Inspesaun no Fiskalizasaun Atividade Ekonómika, Sanitária no Alimentár Instutu Públiku (AIFAESA, I.P), halo inspesaun ba loja no kioske sira ne’ebé maka hala’o atividade negósiu iha postu adminsitrativu Lacluta, Viqueque Villa no Ossu.
Diretóra ba Departamentu Operasaun AIFAESA, Claudina Soares Pinto, hateten inspesaun ne’e hala’o bazeia ba Konstituisaun RDTL artigu 58 ne’ebé koa’lia kona-ba diretu konsumidóres sira-nian.
“AIFAESA ho baze legál sira-ne’e maka ami halo inspesaun ba negosiante sira labele viola diretu konsumidór sira-nian no operadór sira tenke garante kualidade labele faan produtu liu prazu ba komunidade konsumidór sira,” nia hateten ba Agência Tatoli, iha Olobai, suku Caraubalu, postu Viqueque Villa.
Tuir-nia atividade inspesaun ne’e komesa ona iha loron 23 fulan-setembru 2024, no to’o sesta ne’e, konsege halo ona inspesaun ba loja no kioske hamutuk 100-resin, no hosi númeru ne’e rejista operadór loja balun maka faan produtu liu prazu.
“Husi inspesaun ne’e ami identifika mós produtu nesesidade báziku sira-ne’ebé liu prazu, naun alimentu sira. Alende ne’e ami haree ba estadarizasaun ba materiál konstrusaun hanesan besi halo uma, ami identifika loja haat viola diretu komunidade sira-nia tanba sira faan presu latuir medida,” nia relata.
Durante inspesaun, ekipa AIFAESA, I.P no Autoridade Munisipál Viqueque deteta kioske no loja balun iha Viqueque halo manipulasaun ba presu sasan ne’ebé maka la tuir presu merkadu.
“Iha inspesaun ami identifika loja no kioske sira faan la tuir presu ne’ebé ami anota hela tanba ida-ne’e la’os ami-nia kompeténsia. Ami sei koordena ho Ministériu Komérsiu Indústria hodi haree ba presu sasán sira-ne’ebé operadór sira faan latuir padraun,” nia subliña.
Iha fatin hanesan komunidade suku Caraubalu, Antonio Alves Soares, hateten durante ne’e loja Xinés sira iha Viqueque faan materiál kontrusaun hanesan besi ninia presu latuir medida ne’ebé maka sira faan ba komunidade.
“Ha’u foin lalais sosa besi halo ha’u-nia uma, ha’u mai sosa besi metru 4, ne’e sira tau metru 6 ho presu $3, depois metru 6 sira halo ba metru 8 sira faan ba $6. Ida-ne’e ami la satifas ho presu materiál konstrusaun. Agora AIFAESA mai sira komesa faan tuir estandar ne’e ami komunidade husu ba AIFAESA kontinua mai halo inspesaun ba loja sira iha Viqueque, atu operadór sira labele espetakula presu sasán, atu ami komunidade iha kbi’it hodi sosa, se la’e ami sosa labele,” nia kestiona.
Tuir observasaun jornalista TATOLI,I.P nian iha terrenu nota sasán nesesidades báziku ne’ebé maka liu ona prazu hanesan mina sosa Bimoli, Pop-mie, aqua gota, Masako, supermie, masin no seluk tan.
Jornalista : Vitorino Lopes da Cos
Editór : Agapito dos Santos
