BAUCAU, 26 setembru 2024 (TATOLI) – Autoridade lokál liuhusi Administradór postu administrativu Quelicai lamenta ho prosesu reabilitasaun estrada iha suku Laculiu ne’ebé to’o oras ne’ekompañia responsável abandona serbisu iha terrenu.
Administradór Postu Administrativu Quelicai, Paul Jacinto Morreira, informa, kompañia hahú abandona serbisu iha fulan-jullu nune’e autoridade suku no postu komunika responsável kompañia maibé to’o ohin loron kontinua la marka prezensa iha terrenu.
“Preokupa tebes, tanba ida-ne’e gasta orsamentu Estadu, maibé abandona projetu iha suku Laculia, aldeia Maule no Laculada nian,” Administradór Postu Quelicai hateten, kuarta ne’e.
Kompañia responsável Jatono Unipessoal Lda hahú serbisu ba projetu reabilitasaun estrada referida iha tinan-2022 ho totál distánsia kilómetru rua husi totál kilómetru neen ne’ebé fahe ba pakote tolu.
Pakote rua seluk hamutuk kilómetru haat responsável husi kompañia rua hanesan Debeingracia unip.lda no Meqxa unip.lda, ne’ebé iha prosesu di’ak tanba besik finaliza.
Paul konsidera kompañia laiha responsabilidade ba kontratu no serbisu iha terrenu nune’e komunidade ezije tanba kondisaun estrada ne’ebé aat presiza aselera hadi’a nune’e bele fasilita movimentu transporte públiku iha fatin referida.
Diretór Serbisu Munisipál Obra Públika Baucau, Agostinho Ximenes, hateten, progresu foin atinje pursentu 20 no serbisu paradu kauze fulan rua, tanba relasiona ho prosesu pagamentu ne’ebé parte kompañia submete ona ba nasionál, maibé seidauk iha rezultadu.
“Ami sei tenta, tanba kestaun pagamentu ne’e nasional nia problema, maibé kestaun serbisu ami eziji nafatin, servisu nee tenke la’o, maibé lae, semana ohin ami se fó karta tomada atensaun ba nia,” Agostinho Ximenes akresenta.
Diretóra kompañia Jatono, Maria Imaculada Soares, hateten, ekipa traballadór iha hela terrenu no rekoñese progresu reabilitasaun estrada referida tarde, tanba kondisaun klima iha terrenu la permite atu babaen sira mantein serbisu.
“Depende ba klima, sé tempu la’o bailoro hanesan ne’e bele hotu, maibé udan difisil, tanba konstrusaun sivíl la’ós hanesan pengadaan,” Maria Soares argumenta.
Jornalista : Natalino Belo
Editór : Evaristo Soares Martins
