DILI, 27 setembru 2024 (TATOLI)—Deputadu PLP iha Parlamentu Nasionál (PN), Maria Angelina Sarmento, husu Governu Konstitusionál da-sia atu sériu investe iha setór saúde hodi hapara ona transferénsia pasiente ba rai-li’ur.
“Ida-ne’e sai preokupasaun durante tinan barak nia laran. Ita haree dívida millaun $20 ho ospitál sira iha rai-li’ur hanesan iha Malázia, Singapura no Indonézia, hanoin millaun $20 ne’e mak ita halo ospitál di’ak ida hodi investe iha ita-nia rain. Hanoin, ita sei la gasta osan boot atu bele transfere pasiente ba halo tratamentu iha rai-li’ur,” Nia hateten hodi responde Agência TATOLI iha resintu Parlamentu Nasionál, sesta ne’e.
Transferénsia pasiente ba rai-li’ur ne’e la’ós de’it kustu ba ospitál maibé ba mós billete, kustu ba família ne’ebé hein pasiente, hahán, alojamentu, nune’e kustu ne’e tau hamutuk boot tebe-tebes, entaun se aposta ba poupansa no kualidade saúde garante sustentabilidade ba futuru atu labele depedénsia ba ospitál rai-li’ur, nune’e di’ak-liu mak investe iha rai-laran.
Tanba ne’e, nia dehan, iha Governu Konstitusionál da-uali (VIII) halo ona akordu ida ho modalidade private public paternship hodi halo dezenvolvimentu ba ospitál no hahú ho diagnóstiku ba HNGV, maibé nia preokupa iha Governu foun mai la kontinua esforsu di’ak ne’ebé iha.
Nia dehan, investimentu karik setór saúde ne’e ida-ne’ebé krusiál liu entaun Timor-Leste tenke tau atensaun, tanba durante ne’e Timor-Leste transfere pasiente ba rai-li’ur barak liu mak moras kankru no moras fuan.
“Se dívida millaun $20 ne’e mak ita investe iha rai-laran, sustentabilidade boot liu no ema-ne’ebé mai halo tratamentu saúde iha ita-nia rai mós bainhira kualidade di’ak ita opta ba rekursu umanu ne’ebé kualidade aas ho esperíensia barak. Ita lori de’it ema mai, ita selu ema ho saláriu di’ak, ema internasionál mós prontu atu mai. Iha ne’ebé, ita bele halo klasifikasaun ba pasiente ne’ebé iha kondisaun atu selu ospitál ho osan ne’ebé kárun uitoan ho sidadaun timoroan ne’ebé laiha kapasidade atu selu finanseiru ho kustu kárun, Governu bele tau 50%. Hanoin, ne’e modalidade ida di’ak,” nia hateten.
Aleinde ne’e, Deputada husi bankada opozisaun ne’e mós husu Ministériu Saúde atu kontinua planu no programa ne’ebé antes ne’e iha Governu anteriór hala’o ona estabelesimentu ospitál Lahane ba fatin kardeaku.
Antes ne’e, 23 setembru 2024, iha reuniaun plenária PN ne’e Deputada bankada PD, Maria Teresa Gusmão, husu Ministériu Saúde (MS) atu rezolve dívida iha ospitál Indonézia, Malázia ho Singapura.
“Husu ba Ministériu Saúde atu rezolve lalais iha dívida ne’ebé husi tempu ba tempu aas ba beibeik, nune’e labele prezudika transferénsia pasiente ba rai-li’ur,” nia levanta liuhusi reuniaun plenária PN.
Nia mós husu MS tau atensaun investe hasa’e kualidade atendimentu saúde oinsá atu hamenus ona transferénsia pasiente ba rai-li’ur, tanba tuir dadus husi Governu ida ba Governu seluk transferénsia pasiente boot ba beibeik no despeza mós boot ba beibeik ho dívida mós rezolve to’o ohin loron seidauk hotu.
Deputadu FRETILIN, David Dias Ximens “Mandati’, dehan dívida iha duni hanesan iha ospitál Malá”zia millaun $2.5 no Singapura millaun $16.
Vise Ministru ba asuntu Parlamentár, Adérito Hugo da Costa, hateten Governu tau atensaun sériu ba dívida no orientasaun ba MS atu rezolve dívida iha ospitál sira-ne’e, hodi nafatin fó seguru ba ospitál sira-ne’e atu fó atendimentu ba pasiente timoroan sira.
Jornalista : Nelson de Sousa
Editór : Cancio Ximenes
